മുഖ്യമന്ത്രി പ്രഖ്യാപനം വൈകുന്നതിനെ പരിഹസിച്ച് കെ മുരളീധരൻ രംഗത്ത്. “കാലാവസ്ഥ മോശമാണ്. ട്രെയിൻ ഇപ്പോഴും സ്റ്റോപ്പിലെത്തിയിട്ടില്ല,” എന്നായിരുന്നു അദ്ദേഹത്തിന്റെ പരിഹാസപരമായ പ്രതികരണം.
മുഖ്യമന്ത്രി ആരാകണമെന്ന കാര്യത്തിൽ അന്തിമ തീരുമാനം ഹൈക്കമാൻഡിന്റേതാണെന്നും അദ്ദേഹം വ്യക്തമാക്കി.
എല്ലാ എംഎൽഎമാരും ഇതിനകം തന്നെ ഹൈക്കമാൻഡിനെ അവരുടെ അഭിപ്രായം അറിയിച്ചുകഴിഞ്ഞതായും, ഇനി പ്രത്യേകിച്ച് തന്നോട് അഭിപ്രായം ചോദിക്കാനുള്ള സാധ്യത കുറവാണെന്നും മുരളീധരൻ പറഞ്ഞു.
തനിക്കുവേണ്ടി ഫ്ലക്സുകൾ സ്ഥാപിക്കരുതെന്ന് പ്രവർത്തകരോട് നിർദേശിച്ചിട്ടുണ്ടെന്നും അദ്ദേഹം വ്യക്തമാക്കി. “അങ്ങനെ കണ്ടാൽ അപ്പോഴേ അത് തള്ളി കളയും,” എന്നും അദ്ദേഹം കൂട്ടിച്ചേർത്തു.
മുഖ്യമന്ത്രി പ്രഖ്യാപനം വൈകുന്നതിൽ ജനങ്ങൾക്ക് ബുദ്ധിമുട്ടുണ്ടാകുന്നുവെന്നും അദ്ദേഹം അഭിപ്രായപ്പെട്ടു. മന്ത്രിസഭയിൽ പ്രത്യേക വകുപ്പുകളോട് താൽപര്യമില്ലെന്നും, മന്ത്രിസ്ഥാനം എന്നതിലുപരി വട്ടിയൂർക്കാവ് എംഎൽഎയായി തുടരാനാണ് കൂടുതൽ ആഗ്രഹമെന്നും കെ. മുരളീധരൻ വ്യക്തമാക്കി.
