ഗ്യാനേഷ് കുമാറിനെതിരായ വിജിലൻസ് അന്വേഷണം എങ്ങനെ മുന്നോട്ടുകൊണ്ടുപോകണമെന്നത് ആഭ്യന്തര മന്ത്രിയുടെ തീരുമാന വിഷയമല്ലെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല വ്യക്തമാക്കി. അന്വേഷണത്തിന്റെ സ്വഭാവവും നടപടിക്രമങ്ങളും വിജിലൻസ് ഡയറക്ടറും അന്വേഷണ ഉദ്യോഗസ്ഥരുമാണ് നിശ്ചയിക്കേണ്ടതെന്നും അദ്ദേഹം പറഞ്ഞു.
20 വർഷത്തിന് ശേഷമാണ് അന്വേഷണം നടക്കുന്നതെന്ന വിമർശനങ്ങൾ തള്ളിക്കളഞ്ഞ മന്ത്രി, കുറ്റകൃത്യങ്ങൾ കാലഹരണപ്പെടുന്നില്ലെന്നും “ക്രൈം വിൽ നെവർ ഡൈ” എന്ന തത്വമാണ് നിയമവ്യവസ്ഥ പിന്തുടരുന്നതെന്നും ചൂണ്ടിക്കാട്ടി. ലക്ഷ്മൺ കേസിനെ ഉദാഹരണമായി പരാമർശിച്ച അദ്ദേഹം, പഴയ കേസുകളിലും അന്വേഷണം നടത്തുന്നതിൽ അസ്വാഭാവികതയില്ലെന്ന് വ്യക്തമാക്കി.
ഗ്യാനേഷ് കുമാറിനെതിരായ പ്രക്ഷോഭം ചരിത്രപരമായ സമരമായി മാറുകയാണെന്നും അതിന് ജനങ്ങളിൽ നിന്ന് വ്യാപക പിന്തുണ ലഭിക്കുന്നുണ്ടെന്നും മന്ത്രി പറഞ്ഞു.
കളമശ്ശേരി കൂട്ടബലാത്സംഗ കേസിൽ കർശന നടപടികൾ സ്വീകരിക്കുമെന്ന് രമേശ് ചെന്നിത്തല അറിയിച്ചു. വിഷയത്തിൽ ഡിജിപിക്ക് പ്രത്യേക നിർദേശം നൽകിയിട്ടുണ്ടെന്നും അദ്ദേഹം പറഞ്ഞു.
സ്പാകളുടെ മറവിൽ നടക്കുന്ന തട്ടിപ്പുകളും അതിക്രമങ്ങളും തടയാൻ ശക്തമായ നടപടികൾ സ്വീകരിക്കുമെന്നും മന്ത്രി മുന്നറിയിപ്പ് നൽകി. എറണാകുളം ജില്ലയിൽ ഇത്തരം പരാതികൾ കൂടുതലായി ലഭിക്കുന്നുണ്ടെന്നും സെക്സ് റാക്കറ്റുകൾ പ്രവർത്തിക്കുന്നുവെന്ന വിവരങ്ങളുടെ അടിസ്ഥാനത്തിൽ വ്യാപക പരിശോധനയും നിയമനടപടികളും ഉണ്ടാകുമെന്നും അദ്ദേഹം വ്യക്തമാക്കി.
അതേസമയം, രാഹുൽ മാങ്കൂട്ടത്തിലിനെ വിമർശിച്ച് ഇൻസ്റ്റഗ്രാമിൽ പോസ്റ്റ് ചെയ്ത യുവാവിനെതിരെ കേസെടുത്ത സംഭവത്തെക്കുറിച്ച് തനിക്ക് വിവരം ലഭിച്ചിട്ടില്ലെന്ന് മന്ത്രി പ്രതികരിച്ചു. യുഡിഎഫിൽ കൂടിയാലോചനകളില്ലെന്നും മാധ്യമങ്ങളിലൂടെയാണ് കാര്യങ്ങൾ അറിയുന്നതെന്നുമുള്ള അടൂർ പ്രകാശിന്റെ പരാതിയെക്കുറിച്ചുള്ള ചോദ്യത്തിന് അദ്ദേഹം മറുപടി നൽകാൻ തയ്യാറായില്ല
