രാജ്യത്തെ എസ്‌.ഐ.ആർ നടപടികളുടെ സമയപരിധി കേന്ദ്ര തെരഞ്ഞെടുപ്പ് കമ്മീഷൻ നീട്ടി. ഫോമുകൾ തിരികെ സമർപ്പിക്കാൻ ഡിസംബർ 16 വരെ സമയം അനുവദിച്ചു. കേരളം ഉൾപ്പെടെ 12 സംസ്ഥാനങ്ങളിലാണ് സമയപരിധി നീട്ടിയിരിക്കുന്നത്. നേരത്തെ ഡിസംബർ 4നാണ് നടപടിക്രമം പൂർത്തിയാക്കണമെന്ന് കമ്മീഷൻ നിർദേശിച്ചിരുന്നത്.
അന്തിമ വോട്ടർപട്ടിക പ്രസിദ്ധീകരണ തീയതിയും ഫെബ്രുവരി 14 ആയി മാറ്റിയിട്ടുണ്ട്. കേരളത്തിൽ എൻയുമറേഷൻ ഫോം വിതരണം 99 ശതമാനത്തോളം പൂർത്തിയായിട്ടുണ്ടെങ്കിലും, ഏകദേശം ഏഴുലക്ഷം ഫോമുകൾ ഇപ്പോഴും തിരികെ ലഭിക്കാനുണ്ട്. കൂടാതെ 88,000-ത്തോളം പേരെ കണ്ടെത്താനുള്ള പ്രക്രിയയും ബാക്കിയാണ്.
ഈ സാഹചര്യത്തിലാണ് തീവ്ര വോട്ടർപട്ടിക പരിഷ്‌കരണ സമയപരിധി നീട്ടിയത്. തദ്ദേശ തിരഞ്ഞെടുപ്പ് സമയമായതിനാൽ എസ്‌.ഐ.ആർ നീട്ടിവെക്കണമെന്ന് ബി.ജെ.പി ഒഴികെയുള്ള മറ്റു രാഷ്ട്രീയ പാർട്ടികൾ ആവശ്യപ്പെട്ടിരുന്നു.
