ലൈംഗിക പീഡനക്കേസിൽ പ്രതിയായ എംഎൽഎ രാഹുൽ മാങ്കൂട്ടത്തിൽ ഇനി ഒരു പൊതു പരിപാടിയിലും പങ്കെടുക്കരുതെന്ന് ഇതിനകം തന്നെ നിർദേശിച്ചിട്ടുണ്ടെന്ന് കോൺഗ്രസ് നേതാവ് കെ. മുരളീധരൻ വ്യക്തമാക്കി. കോൺഗ്രസ് സ്ഥാനാർഥികൾക്ക് വേണ്ടി അദ്ദേഹത്തിന് പ്രചാരണത്തിലിറങ്ങാനാകില്ലെന്നും, ഉയരേണ്ട താരങ്ങൾ സ്വയം ഉയരും, ഇല്ലാത്തവർ അസ്തമിക്കുമെന്നും അദ്ദേഹം തിരുവനന്തപുരത്ത് പറഞ്ഞു.
കോൺഗ്രസിലെ നിലവിലെ എംഎൽഎമാരിൽ ആരും ഒളിവിൽ പോയിട്ടില്ലെന്നും, മാറ്റിനിർത്തപ്പെട്ട ഒരു വ്യക്തി ഒളിവിൽ ആണെങ്കിൽ അത് കണ്ടെത്തേണ്ടത് പൊലീസ് തന്നെയാണെന്നും കെ. മുരളീധരൻ പറഞ്ഞു. സസ്പെൻഷനിലുള്ള ആളുകൾ ഏതെങ്കിലും പരിപാടിയിൽ പങ്കെടുക്കുകയാണെങ്കിൽ അതിന് പാർട്ടിക്ക് ഉത്തരവാദിത്വമില്ലെന്നും അത് വ്യക്തിപരമായ കാര്യമായിരിക്കുമെന്നും അദ്ദേഹം കൂട്ടിച്ചേർത്തു. സസ്പെൻഷൻ പുറത്താക്കലിന് തുല്യമായ നടപടിയാണെന്നും, കോൺഗ്രസ് ആ അധ്യായം പൂര്‍ണമായും അവസാനിപ്പിച്ചിട്ടുണ്ടെന്നും അദ്ദേഹം വ്യക്തമാക്കി.
തദ്ദേശ തിരഞ്ഞെടുപ്പിൽ കോൺഗ്രസിന് അനുകൂലമായ സാഹചര്യമാണിപ്പോൾ. സെമിഫൈനലിലെ വിജയം ഫൈനലിനുള്ള ശക്തിയാകും. തിരുവനന്തപുരം കോർപ്പറേഷനിൽ 55 വാർഡുകൾ നേടി അധികാരത്തിൽ വരാനാണ് സാധ്യതയെന്നും കവടിയാർ, ശാസ്തമംഗലം, പേട്ട എന്നിവിടങ്ങളിലും കോൺഗ്രസ് വിജയം നേടുമെന്ന് കെ. മുരളീധരൻ പറഞ്ഞു.
