രാഹുൽ സ്ത്രീത്വത്തെ അപമാനിച്ചെന്ന ആരോപണം അടിസ്ഥാനരഹിതമാണെന്ന് രാഹുല്‍ ഈശ്വറിന്റെ ഭാര്യ ദീപ രാഹുൽ ഈശ്വർ വ്യക്തമാക്കി. AI ഉപയോഗിച്ചുള്ള ദൃശ്യങ്ങളാണ് പ്രചരിപ്പിക്കപ്പെട്ടതെന്നും, പരാതിക്കാരിക്കെതിരെ അവർ സംസാരിച്ചിട്ടില്ലെന്നും, പരാതിക്കാരിയുടെ പേര് അല്ലെങ്കിൽ തിരിച്ചറിയൽ വെളിവാക്കുന്ന തരത്തിൽ രാഹുൽ ഏതൊരു സോഷ്യൽ മീഡിയ പോസ്റ്റും പങ്കുവെച്ചിട്ടില്ലെന്നും ദീപ പറഞ്ഞു.
പാലക്കാട് എംഎൽഎ രാഹുൽ മാങ്കൂട്ടത്തിലിന്റെ പീഡനക്കേസിലെ അതിജീവിതയെ സോഷ്യൽ മീഡിയയിൽ അപമാനിച്ചെന്ന പരാതിയിലാണ് രാഹുൽ ഈശ്വർ അറസ്റ്റിലായത്. അതേസമയം, രാഹുൽ ഈശ്വറിനെ നാളെ രാവിലെ 11 മണിക്ക് കോടതിയിൽ ഹാജരാക്കുമെന്ന് പൊലീസ് അറിയിച്ചു.
വീട്ടിലെത്തിയ പൊലീസ് നടപടി രാഹുൽ ഫേസ്ബുക്കിലൂടെ തന്നെ പങ്കുവെച്ചിരുന്നു. പുരുഷന്മാരുടെ അവകാശങ്ങൾക്കായി താൻ മുന്നോട്ടുള്ള പോരാട്ടം തുടരുമെന്നാണ് അദ്ദേഹത്തിന്റെ പോസ്റ്റിൽ പറഞ്ഞിരിക്കുന്നത്. പൊലീസ് കസ്റ്റഡിയിൽ കഴിയുന്ന സമയത്താണ് ആ പോസ്റ്റ് അപ്‌ലോഡ് ചെയ്തത്. രാഹുലിന്റെ അറസ്റ്റ് ഇപ്പോൾ രേഖപ്പെടുത്തിയിട്ടുണ്ട്.
