ചരിത്രപ്രസിദ്ധമായ ചമ്പക്കുളം മൂലം വള്ളംകളിക്ക് പ്രാദേശിക അവധി പ്രഖ്യാപിക്കണമെന്ന ആവശ്യം ഉയർന്നിരിക്കെ, വിഷയത്തിൽ പ്രതിപക്ഷ നേതാവ് വി.ഡി. സതീശന്റെ പരാമർശം വിവാദമായി. കുട്ടനാട് എംഎൽഎ റെജി ചെറിയാൻ നിയമസഭയിൽ ഉന്നയിച്ച സബ്മിഷന് മറുപടി നൽകുന്നതിനിടെ ആദ്യം സർക്കാർ വിഷയം പരിശോധിക്കാമെന്ന് സതീശൻ പറഞ്ഞെങ്കിലും, തുടർന്ന് നടത്തിയതായി പ്രചരിക്കുന്ന പരാമർശമാണ് പ്രതിഷേധങ്ങൾക്ക് വഴിവെച്ചത്.
ഇതിനെതിരെ കുട്ടനാട്ടിലെ വിവിധ മേഖലകളിൽ പ്രതിഷേധം ശക്തമായിരിക്കുകയാണ്. ഡിവൈഎഫ്ഐ കുട്ടനാട്–തകഴി ബ്ലോക്ക് കമ്മിറ്റിയുടെ നേതൃത്വത്തിൽ ചമ്പക്കുളം ആറ്റിൽ വള്ളം തുഴഞ്ഞ് പ്രതിഷേധ പ്രകടനം സംഘടിപ്പിച്ചു. ചമ്പക്കുളം പള്ളിക്ക് സമീപത്ത് നിന്ന് ആരംഭിച്ച പ്രതിഷേധം കിഴക്കേ ബസ് സ്റ്റാൻഡിലെത്തി, തുടർന്ന് പ്രകടനമായി പടിഞ്ഞാറേ ബസ് സ്റ്റാൻഡിലേക്ക് നീങ്ങി.
പ്രതിഷേധ യോഗത്തിൽ വി.ഡി. സതീശന്റെ കോലം കത്തിക്കുകയും ചെയ്തു. ഡിവൈഎഫ്ഐ ആലപ്പുഴ ജില്ലാ സെക്രട്ടറി ജയിംസ് ശാമുവൽ പരിപാടി ഉദ്ഘാടനം ചെയ്തു. തകഴി ബ്ലോക്ക് സെക്രട്ടറി അജു ആനന്ദ് അധ്യക്ഷത വഹിച്ചു. ജില്ലാ പ്രസിഡന്റ് എസ്. സുരേഷ് കുമാർ ഉൾപ്പെടെയുള്ള നേതാക്കളും പ്രവർത്തകരും യോഗത്തിൽ പങ്കെടുത്തു.
