എംഡിഎംഎ കേസിൽ പൊലീസ് അറസ്റ്റ് ചെയ്ത മുഹമ്മദ് ഹുസൈനെയും അബ്ദുൾ സലാമിനെയും വ്യക്തിപരമായി അറിയാമെന്ന് പ്രതിപക്ഷ നേതാവ് വി.ഡി. സതീശൻ. എന്നാൽ ഇവർ തന്റെ സോഷ്യൽ മീഡിയ ടീമിന്റെ ഭാഗമാണെന്ന പ്രചാരണം അടിസ്ഥാനരഹിതമാണെന്നും, തനിക്കൊരിക്കലും ഔദ്യോഗിക സോഷ്യൽ മീഡിയ ടീം ഉണ്ടായിരുന്നില്ലെന്നും അദ്ദേഹം വ്യക്തമാക്കി.
നവകേരള സദസുമായി ബന്ധപ്പെട്ട പ്രതിഷേധത്തിനിടെ പൊലീസ് ലാത്തിച്ചാർജിൽ ഗുരുതരമായി പരിക്കേറ്റപ്പോഴാണ് മുഹമ്മദ് ഹുസൈനുമായി ആദ്യമായി ബന്ധപ്പെടുന്നതെന്ന് സതീശൻ പറഞ്ഞു. പരിക്കേറ്റ യുവാവിനെ ഫോണിൽ വിളിച്ച് ആശ്വസിപ്പിക്കുകയും പിന്നീട് ഒരു പൊതുപരിപാടിക്കിടെ അദ്ദേഹത്തിന്റെ വീട് സന്ദർശിക്കുകയും ചെയ്തിരുന്നുവെന്നും അദ്ദേഹം വിശദീകരിച്ചു.
“അദ്ദേഹം പിന്നീട് ചില അവസരങ്ങളിൽ കണ്ടിട്ടുണ്ട്. ക്രൂരമായ മർദനമേറ്റ ഒരാളെന്ന നിലയിൽ മാനുഷിക പരിഗണന നൽകിയതാണ്. അറസ്റ്റിലാകുന്നതുവരെ ലഹരിക്കടത്ത് ഉൾപ്പെടെയുള്ള നിയമവിരുദ്ധ പ്രവർത്തനങ്ങളുമായി അദ്ദേഹത്തിന് ബന്ധമുണ്ടെന്ന വിവരം പാർട്ടിക്കോ എനിക്കോ അറിയില്ലായിരുന്നു,” സതീശൻ പറഞ്ഞു.
ഇതിനിടെ, മെറ്റ പ്ലാറ്റ്ഫോമുമായി ബന്ധപ്പെട്ട വിവാദങ്ങളിലും അദ്ദേഹം പ്രതികരിച്ചു. സാമൂഹ്യമാധ്യമ പോസ്റ്റുകൾ നീക്കം ചെയ്യുന്നതിൽ തനിക്ക് സ്വാധീനമുണ്ടെന്ന ആരോപണങ്ങൾ തള്ളി സതീശൻ രംഗത്തെത്തി.
“മെറ്റയ്ക്ക് മുന്നിൽ ഞാൻ വലിയ സ്വാധീനമുള്ള ആളാണെന്ന തരത്തിലുള്ള പ്രചാരണം നടക്കുന്നു. എന്നാൽ ‘CMO Kerala’ എന്ന ഇൻസ്റ്റഗ്രാം പേജ് പുനഃസ്ഥാപിക്കണമെന്ന അപേക്ഷ പോലും മാസങ്ങളായി പരിഗണിക്കപ്പെട്ടിട്ടില്ല. എന്നെ അനുകൂലിക്കുന്ന ചില പോസ്റ്റുകൾ പോലും മെറ്റ നീക്കം ചെയ്തിട്ടുണ്ട്. എനിക്കോ എന്റെ ഓഫീസിനോ മെറ്റയിൽ പ്രത്യേക സ്വാധീനമൊന്നുമില്ല,” അദ്ദേഹം പറഞ്ഞു.
സോഷ്യൽ മീഡിയ പോസ്റ്റുകൾ നീക്കം ചെയ്യപ്പെടുന്നതുമായി ബന്ധപ്പെട്ട് മാധ്യമസ്ഥാപനങ്ങൾ പരാതി നൽകിയാൽ അതിന് പിന്തുണ നൽകാൻ സർക്കാർ തയ്യാറാണെന്നും വി.ഡി. സതീശൻ കൂട്ടിച്ചേർത്തു.
