സംസ്ഥാനത്ത് ഓണക്കിറ്റ് വിതരണത്തിൽ വീഴ്ചയുണ്ടെന്ന വാർത്തകൾ തെറ്റാണെന്ന് മുഖ്യമന്ത്രി വി.ഡി. സതീശൻ. സൗജന്യ ഓണക്കിറ്റ് വിതരണം പുരോഗമിക്കുകയാണെന്നും ആറ് ലക്ഷത്തിലധികം കിറ്റുകൾ തയ്യാറാക്കിയിട്ടുണ്ടെന്നും അദ്ദേഹം പറഞ്ഞു. ഇതിൽ മൂന്ന് ലക്ഷത്തിലധികം കിറ്റുകൾ ഇതിനകം റേഷൻ കടകളിൽ എത്തിച്ചതായും മുഖ്യമന്ത്രി വ്യക്തമാക്കി.
അത്തം തുടങ്ങിയിട്ടേയുള്ളൂവെന്നും കിറ്റ് വിതരണം ചെയ്യേണ്ട സമയമാണിതെന്നും മുഖ്യമന്ത്രി പറഞ്ഞു. മാവേലി സ്റ്റോറുകളിൽ 13 നിത്യോപയോഗ സാധനങ്ങൾ കൃത്യമായി ലഭ്യമാണെന്നും വിപണിയിൽ ഇടപെടുന്നതിനായി സപ്ലൈകോയ്ക്ക് 51 കോടി രൂപ അനുവദിച്ചിട്ടുണ്ടെന്നും അദ്ദേഹം അറിയിച്ചു. വിലക്കയറ്റം നിയന്ത്രിക്കുന്നതിനായി സർക്കാർ ഫലപ്രദമായി ഇടപെടുന്നുണ്ടെന്നും 10 ഇനം സാധനങ്ങൾക്ക് കഴിഞ്ഞ ഓണക്കാലത്തേക്കാൾ വില കുറച്ചതായും മുഖ്യമന്ത്രി അവകാശപ്പെട്ടു.
ക്ഷേമ പെൻഷൻ വിതരണത്തിന് 1105 കോടി
അതേസമയം, ക്ഷേമ പെൻഷൻ വിതരണത്തിനായി 1105 കോടി രൂപ അനുവദിച്ചതായി മുഖ്യമന്ത്രി അറിയിച്ചു. നാളെ മുതൽ ക്ഷേമ പെൻഷൻ വിതരണം ആരംഭിക്കും. ഒരു മാസം പോലും പെൻഷൻ മുടങ്ങാതെ വിതരണം ചെയ്യണമെന്ന സർക്കാരിന്റെ നയത്തിന്റെ ഭാഗമായാണ് ഓണക്കാലത്ത് വിതരണം നേരത്തെയാക്കുന്നതെന്നും അദ്ദേഹം പറഞ്ഞു.
ക്ഷേമനിധി ബോർഡുകളുടെ പെൻഷൻ വിതരണത്തിനായി 132.5 കോടി രൂപയും അനുവദിച്ചിട്ടുണ്ട്. അങ്കണവാടി പെൻഷൻകാരുടെ കുടിശിക തീർക്കുന്നതിനും തുക അനുവദിച്ചു. ജൂലൈ വരെയുള്ള കുടിശിക തീർക്കുമെന്നും മുഖ്യമന്ത്രി വ്യക്തമാക്കി.
പിന്നാക്ക വിഭാഗങ്ങളുടെ സ്കോളർഷിപ്പിനായി 312 കോടി രൂപയും അനുവദിച്ചിട്ടുണ്ട്. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന സാഹചര്യത്തിലും ഓണക്കാലത്ത് ഇത്രയും തുക ചെലവഴിക്കുന്നത് സർക്കാരിന്റെ ഉത്തരവാദിത്തമാണെന്നും മുഖ്യമന്ത്രി പറഞ്ഞു.
