ചിറയൻകീഴിലെ കയ്യാങ്കളിയിൽ രമ്യാ ഹരിദാസ് എംഎൽഎയ്ക്ക് വീഴ്ച സംഭവിച്ചതായി കെപിസിസി ഭാരവാഹി യോഗത്തിൽ എം.എം. ഹസൻ. രമ്യാ ഹരിദാസിന്റെ നടപടികൾ ഉചിതമായിരുന്നില്ലെന്ന അഭിപ്രായവും യോഗത്തിൽ നേതാക്കൾ പങ്കുവെച്ചു. അതേസമയം, കെപിസിസി ഭാരവാഹി യോഗത്തിൽ രമ്യാ ഹരിദാസ് എംഎൽഎ പങ്കെടുത്തില്ല.
വൈദ്യുതി പ്രതിസന്ധി പരിഹരിക്കുന്നതിന് അടിയന്തര നടപടികൾ സ്വീകരിക്കണമെന്നും യോഗത്തിൽ നേതാക്കൾ ആവശ്യപ്പെട്ടു. വൈദ്യുതി പ്രതിസന്ധിയുമായി ബന്ധപ്പെട്ട് കൂടുതൽ വിശദീകരണം നൽകണമെന്ന ആവശ്യവും ഉയർന്നു. പുനഃസംഘടന ഉണ്ടാകുമെന്ന് പറയുന്നതിൽ മാത്രം കാര്യമില്ലെന്നും അടിയന്തരമായി പുനഃസംഘടന നടത്തണമെന്നും എം. വിൻസെന്റ് ആവശ്യപ്പെട്ടു.
കെപിസിസി തലം മുതൽ താഴെത്തട്ടുവരെയുള്ള പാർട്ടി ഘടകങ്ങളിൽ അടിയന്തരമായി പുനഃസംഘടന നടത്തണമെന്നതാണ് ഭാരവാഹി യോഗത്തിലെ പൊതുവികാരം. സംഘടനാ പ്രവർത്തനം ശക്തിപ്പെടുത്തുന്നതിനായി നടപടികൾ വൈകിക്കരുതെന്നും നേതാക്കൾ അഭിപ്രായപ്പെട്ടു.
ചിറയൻകീഴിൽ വീട്ടിൽ കയറിയുള്ള രമ്യാ ഹരിദാസ് എംഎൽഎയുടെയും സംഘത്തിന്റെയും അതിക്രമവും തുടർന്ന് കോൺഗ്രസ് നേതാക്കളുമായുണ്ടായ സംഘർഷവും പാർട്ടിക്ക് നാണക്കേടുണ്ടാക്കിയെന്ന് കെപിസിസി പ്രസിഡന്റും മന്ത്രിയുമായ സണ്ണി ജോസഫ് നേരത്തെ പ്രതികരിച്ചിരുന്നു.
എന്നാൽ, ചിറയൻകീഴിലെ സംഭവത്തിൽ തന്റെ ഭാഗത്തുനിന്നുണ്ടായത് സ്വാഭാവികമായ പ്രതികരണം മാത്രമാണെന്നായിരുന്നു രമ്യാ ഹരിദാസിന്റെ വാദം. സംഭവവുമായി ബന്ധപ്പെട്ട് പാർട്ടിക്കുള്ളിൽ തന്നെ വിമർശനം ശക്തമാകുന്നതിനിടെയാണ് കെപിസിസി ഭാരവാഹി യോഗത്തിലും രമ്യയ്ക്കെതിരെ വിമർശനം ഉയർന്നത്.
