അമേരിക്കൻ പ്രസിഡന്റ് ഡൊണാൾഡ് ട്രംപ് ഇസ്രായേലിനെ “അമേരിക്കൻ ഐക്യനാടുകളുടെ മഹത്തായ സഖ്യകക്ഷി” എന്ന് വിശേഷിപ്പിച്ചു. ഇറാനുമായി സംഘർഷം ശക്തമാകുന്ന സാഹചര്യത്തിൽ ഇസ്രയേലിന്റെ ധൈര്യത്തെയും വിശ്വസ്തതയെയും അദ്ദേഹം പ്രശംസിച്ചു.
ശനിയാഴ്ച (പ്രാദേശിക സമയം) തന്റെ സോഷ്യൽ മീഡിയ പ്ലാറ്റ്ഫോമായ ട്രൂത് സോഷ്യലിൽ പങ്കുവെച്ച കുറിപ്പിലാണ് ട്രംപ് ഇക്കാര്യം വ്യക്തമാക്കിയത്. സംഘർഷകാലങ്ങളിൽ ഇസ്രായേൽ “മറ്റുള്ളവരിൽ നിന്ന് വ്യത്യസ്തമായി” അമേരിക്കയ്ക്കൊപ്പം നിന്നിട്ടുണ്ടെന്നും കഠിനമായി പോരാട്ടം തുടരുകയാണെന്നും അദ്ദേഹം പറഞ്ഞു.
“ഇസ്രായേലിനെ കുറിച്ച് ആളുകൾക്ക് ഇഷ്ടമുണ്ടായാലും ഇല്ലെങ്കിലും, അവർ അമേരിക്കയുടെ ശക്തമായ സഖ്യകക്ഷിയാണെന്ന് തെളിയിച്ചിട്ടുണ്ട്. അവർ ധീരരും വിശ്വസ്തരുമാണ്. സമ്മർദ്ദഘട്ടങ്ങളിൽ അവരുടെ യഥാർത്ഥ സ്വഭാവം തെളിയിച്ച മറ്റ് രാജ്യങ്ങളിൽ നിന്ന് വ്യത്യസ്തമായി, ഇസ്രായേൽ പോരാട്ടം തുടരുകയാണ്, വിജയിക്കാനുള്ള കഴിവ് അവർക്കുണ്ട്,” ട്രംപ് കുറിച്ചു.
ലെബനനിൽ ബോംബാക്രമണം നടത്തുന്നതിനെതിരെ അമേരിക്ക മുന്നറിയിപ്പ് നൽകിയതിന് പിന്നാലെയാണ് ട്രംപിന്റെ പ്രസ്താവന. “മതി, മതി” എന്ന നിലപാടാണ് അമേരിക്കൻ പ്രസിഡന്റിന്റെ മുന്നറിയിപ്പിൽ ഉണ്ടായിരുന്നത്.
