മുസ്ലീം ലീഗ് നേതാവും മുൻ മന്ത്രിയുമായ എം.കെ. മുനീറിനെ ഭരണപരിഷ്കാര കമ്മീഷൻ ചെയർമാനാക്കണമെന്ന ആവശ്യം യുഡിഎഫ് മുന്നണിക്കുള്ളിൽ ശക്തമാകുന്നു. ജൂലൈ 30ന് ചേരുന്ന യുഡിഎഫ് നേതൃയോഗത്തിൽ മുസ്ലീം ലീഗ് ഇക്കാര്യം ഔദ്യോഗികമായി ഉന്നയിക്കുമെന്നാണ് സൂചന.
നിയമസഭാ തിരഞ്ഞെടുപ്പിൽ കോൺഗ്രസിന് ഏറ്റവും ശക്തമായ പിന്തുണ നൽകിയ ഘടകകക്ഷികളിലൊന്നാണ് മുസ്ലീം ലീഗ്. പ്രതിസന്ധി ഘട്ടങ്ങളിൽ യുഡിഎഫിനും കോൺഗ്രസിനും ഒപ്പമുണ്ടായിരുന്ന പാർട്ടിയെന്ന നിലയിൽ പ്രധാനപ്പെട്ട ഒരു ഭരണപദവി ലഭിക്കുമെന്ന പ്രതീക്ഷയിലാണ് ലീഗ് നേതൃത്വം. അതിന്റെ ഭാഗമായാണ് ഭരണപരിഷ്കാര കമ്മീഷൻ ചെയർമാൻ സ്ഥാനം എം.കെ. മുനീറിന് നൽകണമെന്ന ആവശ്യം മുന്നോട്ടുവയ്ക്കുന്നത്.
അതേസമയം, മുതിർന്ന കോൺഗ്രസ് നേതാവ് വി.എം. സുധീരന്റെ പേരും ചില കോൺഗ്രസ് നേതാക്കൾ ഉയർത്തിക്കാട്ടുന്നുണ്ട്. ഭരണപരിഷ്കാര കമ്മീഷൻ അധ്യക്ഷ സ്ഥാനത്തേക്ക് അദ്ദേഹത്തെ പരിഗണിക്കണമെന്ന ആവശ്യവും പാർട്ടിക്കുള്ളിൽ ഉയരുന്നുണ്ടെന്നാണ് വിവരം. എന്നാൽ സുധീരനെ മറ്റ് സുപ്രധാന ചുമതലകളിലേക്ക് പരിഗണിക്കാനുള്ള സാധ്യതകളാണ് കോൺഗ്രസ് നേതൃത്വം പരിശോധിക്കുന്നതെന്നാണ് സൂചന.
ഇതിനിടെ, കേരള കോൺഗ്രസ് (ജോസഫ്) വിഭാഗവും ഭരണപരിഷ്കാര കമ്മീഷൻ ചെയർമാൻ പദവിക്കായി താൽപര്യം പ്രകടിപ്പിച്ചിരുന്നുവെങ്കിലും, നിലവിലെ രാഷ്ട്രീയ ചർച്ചകൾ എം.കെ. മുനീറിന് അനുകൂലമായി നീങ്ങുന്നതായാണ് റിപ്പോർട്ടുകൾ. ഇതിന്റെ ഭാഗമായി കേരള കോൺഗ്രസ് നേതാവ് പി.ജെ. ജോസഫിനെ മുന്നോക്ക സമുദായ ക്ഷേമ കോർപ്പറേഷൻ ചെയർമാനായി പരിഗണിക്കാനുള്ള ആലോചനകളും സജീവമാണ്.
കത്തോലിക്ക വിഭാഗങ്ങളുടെ പിന്തുണയും പി.ജെ. ജോസഫിനുണ്ടെന്നാണ് രാഷ്ട്രീയ വൃത്തങ്ങൾ പറയുന്നത്. അതിനാൽ ഘടകകക്ഷികൾ തമ്മിലുള്ള തുല്യത ഉറപ്പാക്കുന്ന രീതിയിൽ വിവിധ പദവികൾ പങ്കുവെക്കാനുള്ള നീക്കങ്ങളാണ് യുഡിഎഫ് നേതൃത്വതലത്തിൽ നടക്കുന്നത്.
ജൂലൈ 30ന് നടക്കുന്ന നേതൃയോഗം ഈ വിഷയങ്ങളിൽ നിർണായക തീരുമാനങ്ങൾ കൈക്കൊള്ളുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
