ദൗർബല്യങ്ങൾ പരിഹരിച്ച് പാർട്ടി പ്രവർത്തനം കൂടുതൽ ശക്തിപ്പെടുത്തുന്നതിന്റെ ഭാഗമായി കോഴിക്കോട് ചേർന്ന സിപിഎം വിപുലീകൃത സംസ്ഥാന കമ്മിറ്റി യോഗത്തിൽ സംസ്ഥാന സെക്രട്ടേറിയറ്റ് പുനഃസംഘടിപ്പിച്ചു. മുതിർന്ന മൂന്ന് നേതാക്കളെ ഉൾപ്പെടുത്തുകയും രണ്ട് മുതിർന്ന നേതാക്കളെ ഒഴിവാക്കുകയും ചെയ്താണ് സെക്രട്ടേറിയറ്റ് പുനഃസംഘടിപ്പിച്ചത്.
കണ്ണൂരിൽ നിന്നുള്ള മുതിർന്ന നേതാവ് പി. ജയരാജനെ സംസ്ഥാന സെക്രട്ടേറിയറ്റിൽ ഉൾപ്പെടുത്തിയതാണ് പ്രധാന തീരുമാനം. പാലക്കാട് നിന്നുള്ള എം.ബി. രാജേഷും തിരുവനന്തപുരത്ത് നിന്നുള്ള വി. ശിവൻകുട്ടിയും പുതിയതായി സെക്രട്ടേറിയറ്റിൽ എത്തി. ജോൺ ബ്രിട്ടാസിന് സംസ്ഥാന സെക്രട്ടേറിയറ്റ് യോഗങ്ങളിൽ പങ്കെടുക്കാനും അനുമതി നൽകി.
അതേസമയം, ആലപ്പുഴയിൽ നിന്നുള്ള മുതിർന്ന നേതാവ് തോമസ് ഐസക്കിനെയും കോഴിക്കോട് നിന്നുള്ള ടി.പി. രാമകൃഷ്ണനെയും സംസ്ഥാന സെക്രട്ടേറിയറ്റിൽ നിന്ന് ഒഴിവാക്കി. സംസ്ഥാന സമിതിയിൽ ഒൻപത് ക്ഷണിതാക്കളുമുണ്ടാകും.
പാർട്ടിയെ കൂടുതൽ ശക്തിപ്പെടുത്താൻ തിരുത്തലുകൾ
പുതിയ കാലഘട്ടത്തിലെ രാഷ്ട്രീയ സാഹചര്യങ്ങൾക്കനുസരിച്ച് പാർട്ടി പ്രവർത്തനം എങ്ങനെ കൂടുതൽ ശക്തിപ്പെടുത്താമെന്നും നിലവിലുള്ള ദൗർബല്യങ്ങൾ എങ്ങനെ പരിഹരിക്കാമെന്നും ചർച്ച ചെയ്യുന്നതിനായാണ് വിപുലീകൃത സംസ്ഥാന കമ്മിറ്റി യോഗം ചേർന്നത്.
പാർട്ടിയെ കൂടുതൽ ശക്തിപ്പെടുത്തുന്നതിനാവശ്യമായ തിരുത്തലുകൾ സംഘടനാതലത്തിൽ നടപ്പാക്കണമെന്ന വിലയിരുത്തലാണ് യോഗത്തിലുണ്ടായത്. ഇതിന്റെ തുടർച്ചയായാണ് സംസ്ഥാനതലത്തിൽ പാർട്ടിയുമായി ബന്ധപ്പെട്ട നിർണായക തീരുമാനങ്ങൾ കൈക്കൊള്ളുന്ന സംസ്ഥാന സെക്രട്ടേറിയറ്റിൽ മാറ്റങ്ങൾ വരുത്തിയത്.
പുതിയ സംസ്ഥാന സെക്രട്ടേറിയറ്റ്
പിണറായി വിജയൻ
എം.വി. ഗോവിന്ദൻ
ഇ.പി. ജയരാജൻ
കെ.കെ. ശൈലജ
കെ.എൻ. ബാലഗോപാൽ
പി. രാജീവ്
കെ.കെ. ജയചന്ദ്രൻ
വി.എൻ. വാസവൻ
സജി ചെറിയാൻ
എം. സ്വരാജ്
പി.എ. മുഹമ്മദ് റിയാസ്
പി.കെ. ബിജു
പുത്തലത്ത് ദിനേശൻ
എം.വി. ജയരാജൻ
സി.എൻ. മോഹനൻ
പി. ജയരാജൻ
വി. ശിവൻകുട്ടി
എം.ബി. രാജേഷ്
