തമിഴ്നാട് മുഖ്യമന്ത്രി വിജയ് തന്റെ ശിഷ്യനാണെന്നും വിജയ് തങ്ങളുടെ സൃഷ്ടിയാണെന്നും അവകാശപ്പെട്ട പുതുച്ചേരി മുഖ്യമന്ത്രി എൻ. രംഗസാമിക്കെതിരെ രൂക്ഷ വിമർശനവുമായി പുതുച്ചേരി സംസ്ഥാന കോൺഗ്രസ് പ്രസിഡന്റ് വി. വൈത്തിലിംഗം എംപി. രംഗസാമിയുടെയും അനുയായികളുടെയും പ്രസ്താവനകൾക്കെതിരെയാണ് വൈത്തിലിംഗം രംഗത്തെത്തിയത്.
പുതുച്ചേരി കോൺഗ്രസ് ആസ്ഥാനത്ത് മാധ്യമങ്ങളെ കണ്ട വൈത്തിലിംഗം, പുതുച്ചേരി സർക്കാർ അവതരിപ്പിച്ച ബജറ്റിൽ സംസ്ഥാന പദവിയും തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പും സംബന്ധിച്ച് യാതൊരു പ്രഖ്യാപനവും നടത്തിയിട്ടില്ലെന്ന് ആരോപിച്ചു. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് ഉടൻ നടത്തണമെന്ന് ആവശ്യപ്പെട്ട് കോൺഗ്രസ് ഉടൻ സമ്മേളനവും പ്രതിഷേധ പരിപാടികളുടെ പരമ്പരയും സംഘടിപ്പിക്കുമെന്നും അദ്ദേഹം അറിയിച്ചു.
2029ലെ പൊതുതെരഞ്ഞെടുപ്പിൽ കോൺഗ്രസ് നേതൃത്വത്തിലുള്ള സഖ്യത്തിന്റെ പ്രധാനമന്ത്രി സ്ഥാനാർഥി രാഹുൽ ഗാന്ധിയാണെന്ന കാര്യത്തിൽ മാറ്റമില്ലെന്നും വൈത്തിലിംഗം വ്യക്തമാക്കി.
തമിഴ്നാട് മുഖ്യമന്ത്രി വിജയ് മാധ്യമങ്ങളെ കാണാറില്ലെന്നും അതുപോലെ പുതുച്ചേരി മുഖ്യമന്ത്രി രംഗസാമിയും മാധ്യമങ്ങളെ ഒഴിവാക്കുകയാണെന്നും അദ്ദേഹം പരിഹസിച്ചു. വിജയ് തന്റെ ശിഷ്യനാണെന്നും വിജയ് തങ്ങളുടെ സൃഷ്ടിയാണെന്നും രംഗസാമിയും അദ്ദേഹത്തിന്റെ അനുയായികളും അവകാശപ്പെടുന്നത് രാഷ്ട്രീയമായി പരിഹാസ്യമായ നിലപാടാണെന്നും വൈത്തിലിംഗം പറഞ്ഞു.
കാവേരി നദീജലം പുതുച്ചേരിയിലേക്ക് എത്തിക്കുന്നതിൽ രംഗസാമി സർക്കാർ പരാജയപ്പെട്ടുവെന്നും അദ്ദേഹം ആരോപിച്ചു. നിലവിലെ സാഹചര്യത്തിൽ കാവേരി ജലം പുതുച്ചേരിയിലേക്ക് എത്തിക്കാൻ മുഖ്യമന്ത്രി രംഗസാമി ഇനി എപ്പോഴാണ് നടപടി സ്വീകരിക്കുകയെന്നും വൈത്തിലിംഗം ചോദിച്ചു. തട്ടഞ്ചാവടി മണ്ഡലത്തിൽ ഉപതെരഞ്ഞെടുപ്പ് നടന്നാൽ അത് തമിഴക വെട്രി കഴകത്തിന് (ടിവികെ) വിട്ടുകൊടുക്കുമെന്നും ആവശ്യമെങ്കിൽ സ്ഥാനാർഥിയെ പോലും രംഗസാമി തന്നെ തീരുമാനിക്കുമെന്നും അദ്ദേഹം ആരോപിച്ചു.
പുതുച്ചേരിക്ക് സംസ്ഥാന പദവി ലഭിക്കില്ലെന്ന് അറിയാമായിരുന്നിട്ടും രാഷ്ട്രീയ ആവശ്യങ്ങൾക്കനുസരിച്ച് രംഗസാമി സംസ്ഥാന പദവി വിഷയത്തിൽ ആവർത്തിച്ച് സംസാരിക്കുകയാണെന്നും വൈത്തിലിംഗം പരിഹസിച്ചു. തൊണ്ടവേദനയ്ക്ക് മരുന്ന് പുരട്ടുന്നതുപോലെ രാഷ്ട്രീയ ആവശ്യങ്ങൾ ഉയരുമ്പോഴെല്ലാം അദ്ദേഹം സംസ്ഥാന പദവിയെക്കുറിച്ച് സംസാരിക്കുകയാണെന്നും വിമർശിച്ചു.
ഇന്ത്യയിലെ ഏറ്റവും മോശം നിയമസഭകളിലൊന്നാണ് പുതുച്ചേരിയിലേതെന്നും വൈത്തിലിംഗം ആരോപിച്ചു. നിയമസഭയിലെ അധികാരങ്ങളെല്ലാം മന്ത്രി നമശ്ശിവായത്തിന്റെ കൈകളിലാണെന്നും ഭരണകക്ഷി-പ്രതിപക്ഷ വ്യത്യാസം പോലും വ്യക്തമല്ലെന്നും അദ്ദേഹം പറഞ്ഞു. യഥാർഥ പ്രതിപക്ഷമായി പ്രവർത്തിക്കേണ്ട ഡിഎംകെ ഭരണകക്ഷിയെ പിന്തുണയ്ക്കുകയാണെന്നും വൈത്തിലിംഗം ആരോപിച്ചു.
രംഗസാമിയും നമശ്ശിവായവും തമ്മിലുള്ള രാഷ്ട്രീയ ധാരണയെ പരിഹസിച്ച വൈത്തിലിംഗം, ‘അമ്മായിയപ്പൻ രംഗസാമിയുടെയും മരുമകൻ നമശ്ശിവായത്തിന്റെയും മധുവിധു ഇപ്പോഴും അവസാനിച്ചിട്ടില്ല’ എന്നും പറഞ്ഞു.
