കൊച്ചി ബിനാലെ ഫൗണ്ടേഷൻ പ്രസിഡന്റ് സ്ഥാനത്ത് നിന്ന് പ്രശസ്ത ചിത്രകാരൻ ബോസ് കൃഷ്ണമാചാരി രാജിവെച്ചു. വ്യക്തിപരമായ കാരണങ്ങളാലാണ് അദ്ദേഹം സ്ഥാനമൊഴിയുന്നതെന്ന് ഫൗണ്ടേഷൻ അറിയിച്ചു. ട്രസ്റ്റ് അംഗം കൂടിയായിരുന്ന ബോസ് കൃഷ്ണമാചാരി, കൊച്ചി മുസിരിസ് ബിനാലെയുടെ സ്ഥാപക നേതാക്കളിൽ ഒരാളാണ്.
ബിനാലെയെ അന്താരാഷ്ട്ര കലാഭൂപടത്തിൽ ശ്രദ്ധേയമാക്കുന്നതിലും അതിന്റെ വളർച്ചയിലും ബോസ് കൃഷ്ണമാചാരി നിർണായക പങ്കുവഹിച്ചു. അദ്ദേഹത്തിന്റെ രാജിക്കാര്യം ഫൗണ്ടേഷൻ ചെയർപേഴ്സൺ വി. വേണുവാണ് ഔദ്യോഗികമായി അറിയിച്ചത്.
പുതിയ പ്രസിഡന്റിനെ കണ്ടെത്തുന്നതിനുള്ള നടപടികൾ ആരംഭിച്ചതായി ബിനാലെ അധികൃതർ പുറത്തിറക്കിയ പത്രക്കുറിപ്പിൽ വ്യക്തമാക്കി.
