സംസ്ഥാനത്ത് യു.ഡി.എഫ് നേടിയ വൻ വിജയത്തിന് പിന്നാലെ, ഈ നേട്ടത്തെ വിനയപൂർവ്വം സ്വീകരിക്കുന്നുവെന്ന് മറിയ ഉമ്മൻ പ്രതികരിച്ചു. മുൻ മുഖ്യമന്ത്രി ഉമ്മൻ ചാണ്ടിയുടെ മകളായ മറിയ ഉമ്മൻ, പത്ത് വർഷത്തെ ഇടതുഭരണത്തിന് അറുതി വരുത്തി ജനാധിപത്യ ശക്തികൾ നാടൊട്ടാകെ വിജയം കുറിച്ചുവെന്ന് ഫേസ്ബുക്ക് കുറിപ്പിൽ പറഞ്ഞു.
തിരഞ്ഞെടുപ്പ് പ്രചാരണത്തിന്റെ ഭാഗമായി കാസർകോട് മുതൽ തിരുവനന്തപുരം വരെ 71 മണ്ഡലങ്ങളിൽ സഞ്ചരിച്ചതായി അവർ വ്യക്തമാക്കി. ഈ യാത്രയിൽ മാറ്റത്തിനായുള്ള ജനങ്ങളുടെ ആകാംക്ഷയും ഉമ്മൻ ചാണ്ടിയോടുള്ള അതുല്യമായ സ്നേഹവും നേരിട്ട് അനുഭവിക്കാൻ കഴിഞ്ഞുവെന്നും അവർ കൂട്ടിച്ചേർത്തു.
ഈ വിജയം വെറും രാഷ്ട്രീയ നേട്ടമല്ലെന്നും, മറിച്ച് പാവപ്പെട്ടവരുടെയും യുവാക്കളുടെയും സ്ത്രീകളുടെയും പ്രതീക്ഷയുടെ പ്രതിഫലനമാണെന്നും മറിയ ഉമ്മൻ ചൂണ്ടിക്കാട്ടി. നാടിനെ വീണ്ടെടുക്കാനുള്ള ഈ ജനവിശ്വാസത്തെ മുഴുവൻ ഉത്തരവാദിത്തത്തോടെയും ഏറ്റെടുക്കുന്നതായും അവർ വ്യക്തമാക്കി.
