കോഴിക്കോട് ജില്ലയിലെ വടകരയിൽ കോൺഗ്രസ് നേതാവിന്റെ വീട്ടിൽ വെച്ച് ശരീരത്തിൽ പെട്രോളൊഴിച്ച് തീകൊളുത്തിയ വയോധികൻ മരണത്തിന് കീഴടങ്ങി. തിരുവള്ളൂർ സ്വദേശിയായ ചിരികണ്ടോത്ത് ഇബ്രാഹിം (71) ആണ് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ അന്തരിച്ചത്.
കോഴിക്കോട് ഡി.സി.സി സെക്രട്ടറി സുധീർ കുമാറിന്റെ വീട്ടിൽ വെച്ചായിരുന്നു ദാരുണമായ സംഭവം നടന്നത്. ഇന്ന് രാവിലെ 10.30 ഓടെയാണ് ഇബ്രാഹിം സുധീർ കുമാറിന്റെ വസതിയിലെത്തിയത്. തുടർന്ന് കൈയിൽ കരുതിയിരുന്ന പെട്രോൾ സ്വന്തം ശരീരത്തിലേക്ക് ഒഴിച്ച് പെട്ടെന്ന് തന്നെ തീ കൊളുത്തുകയായിരുന്നു. വീട്ടുകാരും നാട്ടുകാരും ഉടൻ തന്നെ ഓടിക്കൂടി തീ അണച്ചെങ്കിലും അപ്പോഴേക്കും ഇബ്രാഹിമിന്റെ ശരീരത്തിൽ 60 ശതമാനത്തോളം ഗുരുതരമായി പൊള്ളലേറ്റിരുന്നു.
സംഭവസ്ഥലത്തേക്ക് ഉടനടിയെത്തിയ വടകര ഫയർഫോഴ്സ് സംഘമാണ് ഇബ്രാഹിമിനെ ആദ്യം വടകര ജില്ലാ ആശുപത്രിയിൽ എത്തിച്ചത്. എന്നാൽ പൊള്ളൽ അതീവ ഗുരുതരമായതിനെ തുടർന്ന് വിദഗ്ധ ചികിത്സയ്ക്കായി പിന്നീട് കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. തീവ്രപരിചരണ വിഭാഗത്തിൽ ചികിത്സയിലിരിക്കെയാണ് ഇപ്പോൾ മരണം സംഭവിച്ചത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
(അറിയിപ്പ്: അടിയന്തര സഹായത്തിന്: ആത്മഹത്യ ഒന്നിനും ഒരു പരിഹാരമല്ല. മാനസികമായ ബുദ്ധിമുട്ടുകളോ ആത്മഹത്യാ ചിന്തകളോ ഉണ്ടാകുന്ന സാഹചര്യത്തിൽ ദയവായി മാനസികാരോഗ്യ വിദഗ്ധരുടെ സഹായം തേടുക. സംസ്ഥാന സർക്കാരിന്റെ ഔദ്യോഗിക ടോൾ ഫ്രീ ഹെൽപ്പ് ലൈൻ നമ്പറുകൾ: 1056, 0471-2552056.)
