ഇന്ത്യൻ പാസഞ്ചർ വാഹന വിപണിയിൽ 2026 മെയ് മാസത്തിൽ വിൽപ്പനയിൽ വൻ വളർച്ച രേഖപ്പെടുത്തി. കഴിഞ്ഞ വർഷം മെയ് മാസത്തെ അപേക്ഷിച്ച് ഇത്തവണ വാഹന വിൽപ്പനയിൽ 26.05 ശതമാനത്തിന്റെ ഗണ്യമായ വർദ്ധനവാണ് ഉണ്ടായത്. ഇതോടെ ആകെ വിറ്റഴിച്ച വാഹനങ്ങളുടെ എണ്ണം 4,40,808 യൂണിറ്റുകളായി ഉയർന്നു.
ഈ മാസത്തെ വിൽപ്പന കണക്കുകളിൽ വിപണിയെ ഞെട്ടിച്ചുകൊണ്ട് വലിയൊരു മാറ്റവും സംഭവിച്ചു. ആഭ്യന്തര വാഹന ഭീമനായ മഹീന്ദ്രയെ മൂന്നാം സ്ഥാനത്തേക്ക് പിന്തള്ളി ടാറ്റ മോട്ടോഴ്സ് വിപണിയിൽ രണ്ടാം സ്ഥാനം തിരിച്ചുപിടിച്ചു.പതിവുപോലെ ഇന്ത്യൻ വാഹന വിപണിയിലെ ഒന്നാം സ്ഥാനം മാരുതി സുസുക്കി ഭദ്രമാക്കി നിർത്തിയിരിക്കുകയാണ്.
മെയ് മാസത്തിൽ മാത്രം 1,90,337 യൂണിറ്റുകളാണ് മാരുതി വിറ്റഴിച്ചത്. കഴിഞ്ഞ വർഷത്തെ അപേക്ഷിച്ച് കമ്പനിയുടെ വിൽപ്പനയിൽ 39.99 ശതമാനത്തിന്റെ വൻ വളർച്ചയാണുണ്ടായത്. ഇതോടെ രാജ്യത്തെ മൊത്തം വാഹന വിപണിയിൽ മാരുതിയുടെ വിഹിതം 43.18 ശതമാനമായി ഉയർന്നു.
വിപണിയിലെ രണ്ടാം സ്ഥാനത്തിനായുള്ള പോരാട്ടത്തിൽ ടാറ്റ മോട്ടോഴ്സും മഹീന്ദ്രയും തമ്മിൽ കടുത്ത മത്സരമാണ് നടന്നത്. ഒടുവിൽ മഹീന്ദ്രയെ നേരിയ വ്യത്യാസത്തിൽ മറികടക്കാൻ ടാറ്റയ്ക്ക് സാധിച്ചു.ടാറ്റ മോട്ടോഴ്സ് : മെയ് മാസത്തിൽ 59,090 വാഹനങ്ങൾ വിറ്റഴിച്ച ടാറ്റ, കഴിഞ്ഞ വർഷത്തെ അപേക്ഷിച്ച് 42.19 ശതമാനത്തിന്റെ മികച്ച വളർച്ച കൈവരിച്ചു
മൂന്നാം സ്ഥാനത്തേക്ക് പിന്തള്ളപ്പെട്ട മഹീന്ദ്ര 58,021 യൂണിറ്റുകളാണ് വിറ്റത്. മുൻവർഷത്തെ അപേക്ഷിച്ച് 10.66 ശതമാനമാണ് മഹീന്ദ്രയുടെ വളർച്ച.ഇരു കമ്പനികളും തമ്മിലുള്ള വിൽപ്പനയിലെ വ്യത്യാസം വെറും 1,069 യൂണിറ്റുകൾ മാത്രമാണെന്നത് മത്സരത്തിന്റെ തീവ്രത വ്യക്തമാക്കുന്നു.
