പ്രമുഖ ഇരുചക്ര വാഹന നിര്മാതാക്കളായ റോയല് എന്ഫീല്ഡ് പുതിയ അഡ്വഞ്ചര് മോട്ടോര്സൈക്കിളായ ഹിമാലയന് 440 വിപണിയിലെത്തിക്കാനുള്ള തയ്യാറെടുപ്പിലാണെന്ന് റിപ്പോര്ട്ടുകള്. ‘D4G’ എന്ന കോഡ് നാമത്തിലുള്ള പദ്ധതിയിലാണ് കമ്പനി പ്രവര്ത്തിക്കുന്നത്. പുതിയ മോഡല് സെപ്റ്റംബറില് അവതരിപ്പിക്കപ്പെടാനാണ് സാധ്യത.
നിലവിലെ ഹിമാലയന് 411ന്റെ പകരക്കാരനായാണ് ഹിമാലയന് 440 എത്തുന്നത്. റോയല് എന്ഫീല്ഡിന്റെ സ്ക്രാം 440 മോഡലിനെ അടിസ്ഥാനമാക്കിയാണ് പുതിയ ബൈക്ക് വികസിപ്പിക്കുന്നത്. സ്ക്രാം 440ല് ഉപയോഗിക്കുന്ന 443 സിസി സിംഗിള് സിലിണ്ടര് എന്ജിന് തന്നെയായിരിക്കും ഹിമാലയന് 440ലും ഉള്പ്പെടുത്തുക എന്നാണ് സൂചന.
25 ബിഎച്ച്പി കരുത്തും 34 എന്എം ടോര്ക്കും ഉല്പ്പാദിപ്പിക്കുന്ന എന്ജിനൊപ്പം ആറ് സ്പീഡ് ഗിയര്ബോക്സും ലഭിക്കുമെന്നാണ് റിപ്പോര്ട്ടുകള്. മുന്ഗാമിയായ ഹിമാലയന് 411ന്റെ പരുക്കന് അഡ്വഞ്ചര് ഡിസൈന് ശൈലി പുതിയ മോഡലിലും നിലനിര്ത്തുമെന്നാണ് വിലയിരുത്തല്.
റോയല് എന്ഫീല്ഡിന്റെ അഡ്വഞ്ചര് നിരയില് ഹിമാലയന് 450ന് താഴെയായിരിക്കും ഹിമാലയന് 440യുടെ സ്ഥാനം. റൈഡിങ് മോഡുകള്, ട്രാക്ഷന് കണ്ട്രോള്, സ്വിച്ച് ചെയ്യാവുന്ന എബിഎസ്, ട്രിപ്പര് നാവിഗേഷന് പോഡ് തുടങ്ങിയ ആധുനിക സവിശേഷതകളും ബൈക്കില് ഉള്പ്പെടാന് സാധ്യതയുണ്ട്. പുതിയ മോഡലിന്റെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് വാഹന പ്രേമികള്.
