പുതിയ യൂണിഫോം അവതരിപ്പിക്കാൻ ഫാഷൻ ഷോ സംഘടിപ്പിച്ച പാകിസ്ഥാൻ ഇന്റർനാഷണൽ എയർലൈൻസിനെതിരെ യാത്രക്കാരുടെയും സമൂഹമാധ്യമ ഉപയോക്താക്കളുടെയും വിമർശനം ശക്തം. ജീവനക്കാരുടെ വസ്ത്രം മാറ്റുന്നതിനേക്കാൾ വിമാനങ്ങളുടെ നിലവാരം, സർവീസ്, സമയനിഷ്ഠ എന്നിവ മെച്ചപ്പെടുത്തുന്നതിനാണ് മുൻഗണന നൽകേണ്ടതെന്നാണ് വിമർശനം.
ഒരു ദശാബ്ദത്തിന് ശേഷം ജീവനക്കാർക്ക് പുതിയ രൂപം നൽകുന്നതിന്റെ ഭാഗമായി സെപ്റ്റംബർ 16-നാണ് പിഐഎ ന്യൂ യൂണിഫോം ഡിസൈൻ ഷോകേസ് സംഘടിപ്പിച്ചത്. പാകിസ്ഥാനിലെ പ്രമുഖ ഫാഷൻ ഡിസൈനർമാരായ മഹീൻ ഖാൻ, ദീപക് പെർവാനി, ഫറാസ് മാനൻ, എച്ച്എസ്വൈ, നോമി അൻസാരി തുടങ്ങിയവർ ഉൾപ്പെടെ 10 ഡിസൈനർമാരാണ് പരിപാടിയിൽ പുതിയ യൂണിഫോം മാതൃകകൾ അവതരിപ്പിച്ചത്.
പാകിസ്ഥാൻ സംസ്കാരം, ആധുനികത, പ്രവർത്തനക്ഷമത എന്നിവ സമന്വയിപ്പിച്ചുള്ള പുതിയ രൂപമാണ് ലക്ഷ്യമിടുന്നതെന്ന് പിഐഎ വ്യക്തമാക്കി. അവതരിപ്പിച്ച ഡിസൈനുകളിൽനിന്ന് ഒരു മാതൃക തിരഞ്ഞെടുക്കുകയും പിന്നീട് അത് ഔദ്യോഗിക യൂണിഫോമായി അവതരിപ്പിക്കുകയും ചെയ്യും. അന്തിമ രൂപകൽപ്പനയും നടപ്പാക്കൽ സമയക്രമവും ഇതുവരെ പ്രഖ്യാപിച്ചിട്ടില്ല.
എന്നാൽ യൂണിഫോം മാറ്റാനുള്ള നീക്കത്തേക്കാൾ വിമാന സർവീസുകളിലെ അടിസ്ഥാന പ്രശ്നങ്ങൾ പരിഹരിക്കണമെന്നാണ് യാത്രക്കാരുടെ ആവശ്യം. ‘ആദ്യം വിമാനങ്ങൾ ശരിയാക്കൂ’, ‘ഫ്ലൈറ്റ് വൈകുന്നത് നിർത്തൂ’, ‘കുറഞ്ഞത് വിമാനത്തിലെ എസി എങ്കിലും പ്രവർത്തിക്കുന്നുണ്ടെന്ന് ഉറപ്പാക്കൂ’ തുടങ്ങിയ പ്രതികരണങ്ങളാണ് സമൂഹമാധ്യമങ്ങളിൽ ഉയർന്നത്.
പുതിയ യൂണിഫോം ധരിച്ച ജീവനക്കാരെത്തിയാലും വിമാനങ്ങൾ വൈകുന്നത് തുടരുകയാണെങ്കിൽ അതുകൊണ്ട് എന്ത് പ്രയോജനമെന്ന തരത്തിലുള്ള പരിഹാസ പ്രതികരണങ്ങളും സമൂഹമാധ്യമങ്ങളിൽ വ്യാപകമായി പ്രചരിച്ചു. ഇതോടെ പിഐഎയുടെ പുതിയ ഫാഷൻ സംരംഭം വലിയ ചർച്ചയായി.
സാമ്പത്തിക പ്രതിസന്ധി, പഴയ വിമാനങ്ങൾ, സർവീസുകളുടെ നിലവാരം സംബന്ധിച്ച വിമർശനങ്ങൾ തുടങ്ങിയ വെല്ലുവിളികൾ നേരിടുന്ന സാഹചര്യത്തിലാണ് പിഐഎയുടെ പുതിയ നീക്കം. വിമാനക്കമ്പനിയുടെ സ്വകാര്യവൽക്കരണത്തിന് പിന്നാലെ ബ്രാൻഡിന്റെ രൂപവും പ്രതിച്ഛായയും പുതുക്കുന്നതിന്റെ ഭാഗമായാണ് യൂണിഫോം മാറ്റത്തിനുള്ള ശ്രമമെന്നാണ് റിപ്പോർട്ടുകൾ.
പുതിയ രൂപത്തിലൂടെ ബ്രാൻഡ് ഇമേജ് മെച്ചപ്പെടുത്താനുള്ള ശ്രമം നടക്കുമ്പോഴും യാത്രക്കാരുടെ പ്രധാന ആവശ്യം സർവീസുകളുടെ വിശ്വാസ്യതയും അടിസ്ഥാന സൗകര്യങ്ങളുടെ മെച്ചപ്പെടുത്തലുമാണെന്നതാണ് സമൂഹമാധ്യമ പ്രതികരണങ്ങളിൽ നിന്ന് വ്യക്തമാകുന്നത്.
