കേരളത്തിൽ യുഡിഎഫ് സംവിധാനവും ഭരണവും പൂർണമായും അലങ്കോലപ്പെട്ടിരിക്കുകയാണെന്നും കോൺഗ്രസിനകത്തും മുന്നണിയിലും ഗുരുതരമായ ഭിന്നത നിലനിൽക്കുകയാണെന്നും സിപിഎം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. യുഡിഎഫ് കൺവീനർ തന്നെ പ്രധാന തീരുമാനങ്ങളെക്കുറിച്ച് അറിയില്ലെന്ന് പരസ്യമായി പറയുന്ന സാഹചര്യമാണ് നിലവിലുള്ളതെന്നും അദ്ദേഹം പറഞ്ഞു.
മുഖ്യമന്ത്രി വി.ഡി. സതീശന് കോൺഗ്രസിനകത്ത് പരിമിതമായ പിന്തുണ മാത്രമാണുള്ളതെന്നും ആർഎസ്എസും ബിജെപിയുമാണ് അദ്ദേഹത്തിന്റെ യഥാർഥ പിന്തുണക്കാരെന്നും എം.വി. ഗോവിന്ദൻ ആരോപിച്ചു. നിലവിലെ സർക്കാർ ആർഎസ്എസ് പിന്തുണയോടെയുള്ള ഭരണമാണ് നടത്തുന്നതെന്നും അദ്ദേഹം വിമർശിച്ചു.
മുസ്ലിം ലീഗ് ആർഎസ്എസിന്റെ കടന്നാക്രമണങ്ങൾക്ക് മുന്നിൽ കീഴടങ്ങിയിരിക്കുകയാണെന്നും കെ.എം. ഷാജിയെ വാഹനത്തിൽ നിന്ന് ഇറക്കിവിട്ട സംഭവത്തിൽ പോലും പരാതിയില്ലെന്ന് പറയുന്ന നിലപാടാണ് ലീഗ് സ്വീകരിച്ചതെന്നും അദ്ദേഹം കുറ്റപ്പെടുത്തി.
അതേസമയം, തിരുവനന്തപുരത്തെ ഒരു സിപിഎം കൗൺസിലർക്കെതിരായ കൈക്കൂലി ആരോപണത്തിൽ പാർട്ടി ഗൗരവമായ അന്വേഷണം നടത്തുമെന്നും ആരോപണത്തിൽ വസ്തുത കണ്ടെത്തിയാൽ ആവശ്യമായ നടപടി സ്വീകരിക്കുമെന്നും എം.വി. ഗോവിന്ദൻ വ്യക്തമാക്കി.
