ഇന്ത്യൻ സൈന്യത്തിൽ യൂണിഫോം പരിഷ്കാരം പിൻവലിക്കുന്നു; റെജിമെന്റുകളുടെ പഴയ പാരമ്പര്യങ്ങൾ തിരിച്ചെത്തും

ഇന്ത്യൻ സൈന്യത്തിലെ ഉന്നത ഉദ്യോഗസ്ഥരുടെ യൂണിഫോം ചട്ടങ്ങളിൽ മാറ്റം വരുത്താൻ തീരുമാനം. 2023 ഓഗസ്റ്റിൽ നടപ്പാക്കിയ ഏകീകൃത വസ്ത്രധാരണരീതി പിൻവലിച്ച് റെജിമെന്റുകളുടെയും കോർപ്സുകളുടെയും പരമ്പരാഗത വേഷവിധാനങ്ങളും ചിഹ്നങ്ങളും പുനഃസ്ഥാപിക്കാനാണ് സൈന്യത്തിന്റെ നീക്കം. ഡിസംബർ 1 മുതൽ പുതിയ തീരുമാനം പ്രാബല്യത്തിൽ വരും.

നവംബർ 13ന് പുറത്തിറക്കിയ ആഭ്യന്തര നിർദേശത്തിലാണ് ഇക്കാര്യം വ്യക്തമാക്കിയതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. ഇതോടെ ബ്രിഗേഡിയർ റാങ്കിലും അതിനു മുകളിലുമുള്ള ഉദ്യോഗസ്ഥർക്ക് സ്വന്തം റെജിമെന്റുകളുടെയും കോർപ്സുകളുടെയും തനിമ വ്യക്തമാക്കുന്ന വസ്ത്രങ്ങളും ചിഹ്നങ്ങളും വീണ്ടും ഉപയോഗിക്കാനാകും.

പുതിയ തീരുമാനപ്രകാരം ഗൂർഖ റൈഫിൾസിലെ ഉദ്യോഗസ്ഥർക്ക് പരമ്പരാഗത പ്രത്യേക തൊപ്പികൾ വീണ്ടും ധരിക്കാം. പ്രത്യേക സേനയിലെ ഉദ്യോഗസ്ഥർക്ക് മെറൂൺ ബെററ്റും കവചിത റെജിമെന്റിലെ ഉദ്യോഗസ്ഥർക്ക് കറുത്ത ബെററ്റും തിരിച്ചുകിട്ടും. 2023ലെ പരിഷ്കാരപ്രകാരം ഇവർക്കെല്ലാം കടുംപച്ച ബെററ്റ് ഉപയോഗിക്കണമെന്നായിരുന്നു നിർദേശം.

2023 ഏപ്രിലിൽ നടന്ന ആർമി കമാൻഡർമാരുടെ സമ്മേളനത്തിലാണ് ഉന്നത ഉദ്യോഗസ്ഥർക്കായി ഏകീകൃത വസ്ത്രധാരണരീതി നടപ്പാക്കാൻ തീരുമാനിച്ചത്. അന്നത്തെ കരസേനാ മേധാവി ജനറൽ മനോജ് പാണ്ഡെയുടെ നേതൃത്വത്തിൽ എടുത്ത തീരുമാനം അതേ വർഷം ഓഗസ്റ്റിൽ പ്രാബല്യത്തിൽ വന്നു. ബ്രിഗേഡിയർ റാങ്കിലും അതിനു മുകളിലുമുള്ള ഉദ്യോഗസ്ഥരുടെ ശിരോവസ്ത്രം, ബെൽറ്റ്, റാങ്ക് ബാഡ്ജുകൾ, പാദരക്ഷകൾ എന്നിവയിൽ ഏകീകൃത ചട്ടങ്ങൾ കൊണ്ടുവന്നിരുന്നു. റെജിമെന്റുകളുടെ വ്യത്യസ്തമായ തിരിച്ചറിയലുകൾക്കപ്പുറം സൈന്യത്തിന്റെ ഉന്നത നേതൃത്വത്തിൽ പൊതുവായ ഐക്യവും വ്യക്തിത്വവും ഉറപ്പാക്കുകയായിരുന്നു ലക്ഷ്യം.

എന്നാൽ വിവിധ റെജിമെന്റുകളിൽനിന്നുള്ള അഭിപ്രായങ്ങളും ഏകീകൃത വസ്ത്രധാരണരീതിയുടെ പ്രവർത്തനാനുഭവങ്ങളും വിലയിരുത്തിയ ശേഷമാണ് പഴയ പാരമ്പര്യങ്ങൾ തിരിച്ചുകൊണ്ടുവരാൻ തീരുമാനിച്ചതെന്നാണ് റിപ്പോർട്ട്. നിലവിലെ കരസേനാ മേധാവി ജനറൽ ധീരജ് സേത്തിന്റെ നേതൃത്വത്തിലാണ് ഇതിനുള്ള നടപടികൾ സ്വീകരിച്ചത്. കവചിത കോർപ്സിൽനിന്നുള്ള ഉദ്യോഗസ്ഥനായ അദ്ദേഹത്തിനും പരമ്പരാഗത കറുത്ത ബെററ്റും തവിട്ടുനിറത്തിലുള്ള ഷൂസും ധരിക്കാനാകും.

അതേസമയം, യുദ്ധമേഖലകളിലും സൈനിക പ്രവർത്തനങ്ങളിലും ഉപയോഗിക്കുന്ന വസ്ത്രധാരണരീതിയിൽ മാറ്റമുണ്ടാകില്ല. ഉന്നത ഉദ്യോഗസ്ഥരുടെ ഔദ്യോഗിക യൂണിഫോമുകളിലെ റെജിമെന്റൽ പാരമ്പര്യങ്ങൾ പുനഃസ്ഥാപിക്കുന്നതിലാണ് പുതിയ തീരുമാനം ശ്രദ്ധ കേന്ദ്രീകരിക്കുന്നത്.

മറുപടി രേഖപ്പെടുത്തുക