ആന്ധ്രാപ്രദേശിൽ മുഖ്യമന്ത്രി ചന്ദ്രബാബു നായിഡുവിന്റെ നേതൃത്വത്തിലുള്ള സഖ്യസർക്കാരിനെതിരെ രൂക്ഷ വിമർശനവുമായി എപിസിസി പ്രസിഡന്റ് വൈഎസ് ശർമ്മിള. സംസ്ഥാനത്ത് നടന്ന തിരഞ്ഞെടുപ്പുകളിൽ വ്യാപകമായ ക്രമക്കേടുകളും അക്രമങ്ങളും അരങ്ങേറിയെന്നും ഇത് ജനാധിപത്യത്തിന്റെ കൊലപാതകമാണെന്നും ശർമ്മിള ആരോപിച്ചു. സോഷ്യൽ മീഡിയയിലൂടെയാണ് അവർ സർക്കാരിനെതിരെ വിമർശനമുന്നയിച്ചത്.
കൃത്രിമത്വം എന്ന വാക്കിന് പുതിയ നിർവചനം നൽകിയിരിക്കുകയാണ് സഖ്യസർക്കാരെന്ന് ശർമ്മിള കുറ്റപ്പെടുത്തി. ജനപിന്തുണയിലും വിജയത്തിലും ആത്മവിശ്വാസമില്ലാത്തതിനാലാണ് ബൂത്ത് പിടിച്ചെടുക്കലും കള്ളവോട്ടും നടത്തി വിജയിക്കാൻ ശ്രമിക്കുന്നതെന്നും അവർ ആരോപിച്ചു. തിരഞ്ഞെടുപ്പ് കമ്മീഷൻ ഭരണസഖ്യത്തിന്റെ സമ്മർദത്തിന് വഴങ്ങുകയാണെന്നും ജനവിധിയെ പരിഹസിക്കുന്ന നടപടികളാണ് നടക്കുന്നതെന്നും വിമർശിച്ച ശർമ്മിള, രാജ്യത്തിന്റെ തിരഞ്ഞെടുപ്പ് ചരിത്രത്തിലെ ഇരുണ്ട അധ്യായമാണിതെന്നും പറഞ്ഞു.
സുതാര്യതയെക്കുറിച്ച് പ്രസംഗിക്കുമ്പോൾ തന്നെ തിരഞ്ഞെടുപ്പ് സംവിധാനത്തിന്റെ പ്രവർത്തനം തടസ്സപ്പെടുത്തുന്നത് ഏത് തരത്തിലുള്ള ജനാധിപത്യമാണെന്നും ശർമ്മിള ചോദിച്ചു. ആക്രമണങ്ങളും അക്രമങ്ങളും നിറഞ്ഞ സാഹചര്യത്തിലാണ് സംസ്ഥാനവ്യാപകമായി തിരഞ്ഞെടുപ്പ് നടന്നതെന്നും അവർ ആശങ്ക പ്രകടിപ്പിച്ചു.
തിരഞ്ഞെടുപ്പിലെ ക്രമക്കേടുകളിൽ സംസ്ഥാന തിരഞ്ഞെടുപ്പ് കമ്മീഷൻ അടിയന്തരമായി മറുപടി നൽകണമെന്നും ശർമ്മിള ആവശ്യപ്പെട്ടു. ബൂത്ത് പിടിച്ചെടുക്കൽ, കള്ളവോട്ട്, അക്രമം എന്നിവയുടെ ദൃശ്യതെളിവുകളുള്ള പോളിംഗ് സ്റ്റേഷനുകളിലെ വോട്ടെടുപ്പ് റദ്ദാക്കി റീപോളിംഗ് നടത്തണം. എല്ലാ പോളിംഗ് സ്റ്റേഷനുകളിലെയും വെബ്‌കാസ്റ്റിങ്, സിസിടിവി ദൃശ്യങ്ങൾ നിഷ്പക്ഷമായി പരിശോധിക്കണമെന്നും ക്രമക്കേടുകൾക്ക് കൂട്ടുനിന്ന റിട്ടേണിങ് ഓഫീസർമാർ, പ്രിസൈഡിങ് ഓഫീസർമാർ, പൊലീസ് ഉദ്യോഗസ്ഥർ എന്നിവർക്കെതിരെ കർശന നടപടി സ്വീകരിക്കണമെന്നും അവർ ആവശ്യപ്പെട്ടു.
