ദീപാവലി ദിനത്തിൽ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി ഇന്ത്യൻ ക്രിക്കറ്റ് താരം സൂര്യകുമാർ യാദവ്. ഭാര്യ ദേവീഷ ഷെട്ടിക്കും മകൾക്കുമൊപ്പമാണ് താരം പ്രധാനമന്ത്രിയെ സന്ദർശിച്ചത്. കൂടിക്കാഴ്ച ജീവിതത്തിലെ മറക്കാനാവാത്തതും ഹൃദയസ്പർശിയുമായ നിമിഷമാണെന്ന് സൂര്യകുമാർ സമൂഹമാധ്യമങ്ങളിലൂടെ പ്രതികരിച്ചു.
ഇന്ത്യൻ ജഴ്‌സി അണിഞ്ഞ് രാജ്യത്തെ പ്രതിനിധീകരിക്കുന്നതിൽനിന്ന് പ്രധാനമന്ത്രിയെ നേരിൽ കാണാനുള്ള അവസരത്തിലേക്ക് എത്തിയ യാത്ര ഏറെ അഭിമാനകരമാണെന്ന് സൂര്യകുമാർ എക്സിൽ കുറിച്ചു. ജീവിതത്തിലെ ഉത്തരവാദിത്തങ്ങളെയും അനുഗ്രഹങ്ങളെയും കുറിച്ച് ചിന്തിക്കാൻ ഇത്തരം നിമിഷങ്ങൾ പ്രേരിപ്പിക്കുന്നുവെന്നും അദ്ദേഹം പറഞ്ഞു. ഇന്ത്യൻ പൗരനായതിൽ അഭിമാനിക്കുന്നുവെന്നും പ്രധാനമന്ത്രിയുമായുള്ള കൂടിക്കാഴ്ചയ്ക്ക് നന്ദിയുണ്ടെന്നും താരം കൂട്ടിച്ചേർത്തു.
പൂച്ചെണ്ടുമായാണ് സൂര്യകുമാർ പ്രധാനമന്ത്രിയെ കാണാനെത്തിയത്. കൂടിക്കാഴ്ചയുടെ ചിത്രവും കുടുംബത്തോടൊപ്പം മോദിയുമായി സംസാരിക്കുന്ന വീഡിയോയും അദ്ദേഹം പങ്കുവെച്ചു. പ്രധാനമന്ത്രിയും വീഡിയോ എക്സിൽ പോസ്റ്റ് ചെയ്തിരുന്നു. ദീപാവലി ആഘോഷങ്ങൾക്കിടെ സൂര്യകുമാറിന്റെ കുടുംബവുമായി സന്തോഷത്തോടെ സംസാരിക്കുന്ന പ്രധാനമന്ത്രിയുടെ ദൃശ്യങ്ങളും വീഡിയോയിലുണ്ടായിരുന്നു.
ഈ വർഷത്തെ ദീപാവലി ആഘോഷങ്ങൾക്ക് ശ്രീരാമന്റെയും സരയൂ നദിയുടെയും സാന്നിധ്യം കൂടുതൽ ആത്മീയ പ്രാധാന്യം നൽകിയെന്നും ആഘോഷാന്തരീക്ഷം കൂടുതൽ പവിത്രവും ദിവ്യവുമാക്കിയെന്നും പ്രധാനമന്ത്രി എക്സിൽ കുറിച്ചു.
2024ലെയും 2026ലെയും ഐസിസി ട്വന്റി20 ലോകകപ്പ് കിരീടം നേടിയ ഇന്ത്യൻ ടീമുകളിൽ അംഗമായിരുന്ന സൂര്യകുമാർ യാദവ് രണ്ട് തവണ ലോകകപ്പ് നേട്ടത്തിന്റെ ഭാഗമായി. 2026ലെ ലോകകപ്പിൽ ഇന്ത്യയെ കിരീടത്തിലേക്ക് നയിച്ചതും അദ്ദേഹമായിരുന്നു. 2025ൽ യുഎഇയിൽ നടന്ന ഏഷ്യാ കപ്പിലും സൂര്യകുമാറിന്റെ നേതൃത്വത്തിൽ ഇന്ത്യ കിരീടം നേടിയിരുന്നു.
ട്വന്റി20 ക്രിക്കറ്റിലെ മിന്നും താരമായ സൂര്യകുമാർ ഇന്ത്യക്കായി ഇതുവരെ 113 ടി20 രാജ്യാന്തര മത്സരങ്ങൾ കളിച്ചിട്ടുണ്ട്. 36.35 ശരാശരിയിൽ 3,272 റൺസ് നേടിയ താരം നാല് സെഞ്ചുറികളും 25 അർധസെഞ്ചുറികളും സ്വന്തമാക്കി. ഒരു ടെസ്റ്റ് മത്സരത്തിലും 37 ഏകദിനങ്ങളിലും 86 ഫസ്റ്റ് ക്ലാസ് മത്സരങ്ങളിലും അദ്ദേഹം ഇന്ത്യയെ പ്രതിനിധീകരിച്ചിട്ടുണ്ട്.
1990 സെപ്റ്റംബർ 14ന് അന്നത്തെ ബോംബെയിലാണ് സൂര്യകുമാർ യാദവ് ജനിച്ചത്. ഉത്തർപ്രദേശിലെ ഗാസിപൂരിലാണ് കുടുംബവേരുകൾ.
