ഡ്രോണുകൾക്ക് പിന്നാലെ എഐ ആയുധങ്ങൾ; സൈനിക ശേഷി വർധിപ്പിക്കാൻ ഉത്തരകൊറിയ

ആക്രമണ, പ്രതിരോധ ആയുധ സംവിധാനങ്ങളിൽ ആർട്ടിഫിഷ്യൽ ഇന്റലിജൻസിന്റെയും ഓട്ടോമേഷന്റെയും ഉപയോഗം വ്യാപകമാക്കണമെന്ന് ഉത്തരകൊറിയൻ നേതാവ് കിം ജോങ് ഉൻ. ആയുധങ്ങളുടെ ഉൽപാദനം വർധിപ്പിക്കാനും നിർമാണ സൗകര്യങ്ങൾ കൂടുതൽ മെച്ചപ്പെടുത്താനും പ്രതിരോധ വ്യവസായ സ്ഥാപനങ്ങൾക്ക് അദ്ദേഹം നിർദേശം നൽകി.

ബുധനാഴ്ച മുതൽ വെള്ളിയാഴ്ച വരെ മുതിർന്ന ഉദ്യോഗസ്ഥർക്കും സ്വാധീനമുള്ള സഹോദരി കിം യോ-ജോങ്ങിനുമൊപ്പം വിവിധ പ്രതിരോധ നിർമാണ സ്ഥാപനങ്ങൾ സന്ദർശിക്കുന്നതിനിടെയാണ് കിം നിർദേശം മുന്നോട്ടുവച്ചത്. ഡ്രോണുകളും പീരങ്കി സംവിധാനങ്ങളും 600 എംഎം മൾട്ടിപ്പിൾ ലോഞ്ച് റോക്കറ്റ് സംവിധാനങ്ങളും നിർമിക്കുന്ന കേന്ദ്രങ്ങളും അദ്ദേഹം സന്ദർശിച്ചതായി ഉത്തരകൊറിയൻ ഔദ്യോഗിക മാധ്യമമായ കെസിഎൻഎ റിപ്പോർട്ട് ചെയ്തു.

ഉത്തരകൊറിയയ്ക്ക് പുറത്ത് KN-25 എന്നറിയപ്പെടുന്ന 600 എംഎം റോക്കറ്റ് സംവിധാനം യുഎസ് നിർമിത HIMARS സംവിധാനവുമായി താരതമ്യം ചെയ്യപ്പെടാറുണ്ട്. പരമ്പരാഗത മൾട്ടിപ്പിൾ ലോഞ്ച് റോക്കറ്റ് സംവിധാനത്തിൽ നിന്ന് വ്യത്യസ്തമായി ഹ്രസ്വദൂര ബാലിസ്റ്റിക് മിസൈൽ സംവിധാനത്തിന്റെ സവിശേഷതകളും ഇതിനുണ്ടെന്ന് റിപ്പോർട്ടുകൾ വ്യക്തമാക്കുന്നു.

പീരങ്കി സംവിധാനങ്ങൾക്ക് കൂടുതൽ കേന്ദ്രീകൃതവും ശക്തവുമായ ആക്രമണശേഷിയും വൈവിധ്യമാർന്ന പ്രയോഗശേഷിയും വേണമെന്നാണ് കിം പറഞ്ഞത്. യുദ്ധം തടയുന്നതിനും ആവശ്യമായ സാഹചര്യത്തിൽ പോരാടുന്നതിനുമുള്ള ശേഷി ആയുധ സംവിധാനങ്ങൾക്കുണ്ടാകണമെന്നും അദ്ദേഹം വ്യക്തമാക്കി.

ആക്രമണാത്മകവും പ്രതിരോധപരവുമായ ആയുധ സംവിധാനങ്ങളിൽ എഐയുടെ വ്യാപകമായ ഉപയോഗത്തിനാണ് കിം ഊന്നൽ നൽകിയത്. പീരങ്കി ആയുധങ്ങളുടെ കവചവും ഓട്ടോമേഷനും മെച്ചപ്പെടുത്തണമെന്നും അദ്ദേഹം നിർദേശിച്ചു. ഉൽപാദനം വർധിപ്പിക്കുന്നതിനൊപ്പം നിർമാണ സ്ഥാപനങ്ങളിലെ സാഹചര്യങ്ങളും അടിസ്ഥാന സൗകര്യങ്ങളും മെച്ചപ്പെടുത്തണമെന്നും കിം ആവശ്യപ്പെട്ടു.

രാജ്യത്തെ പ്രധാന സൈനിക ആസൂത്രണ സ്ഥാപനമായ പാർട്ടി സെൻട്രൽ മിലിട്ടറി കമ്മീഷൻ മുന്നോട്ടുവച്ച പദ്ധതികൾ നടപ്പാക്കുന്നതിൽ ഭൂരിഭാഗം നിർമാണ സ്ഥാപനങ്ങളും ഉൽപാദന ലക്ഷ്യങ്ങൾ കൈവരിക്കുന്നതായി കണ്ടെത്തിയതിൽ കിം സംതൃപ്തി പ്രകടിപ്പിച്ചതായും കെസിഎൻഎ റിപ്പോർട്ട് ചെയ്തു.

പരമ്പരാഗത പീരങ്കി സംവിധാനങ്ങൾക്ക് ദക്ഷിണ കൊറിയൻ തലസ്ഥാനമായ സിയോളിന്റെ സമീപപ്രദേശങ്ങൾ വരെ ആക്രമിക്കാനാകുന്ന സാഹചര്യം ഉത്തരകൊറിയയുടെ സൈനിക തന്ത്രത്തിൽ പീരങ്കികൾക്ക് ദീർഘകാലമായി പ്രധാന സ്ഥാനമുണ്ട്. ആണവശേഷി വികസിപ്പിച്ചതിനുശേഷവും പ്യോങ്‌യാങ് പീരങ്കി സംവിധാനങ്ങൾ നവീകരിക്കുകയും വികസിപ്പിക്കുകയും ചെയ്തുവരികയാണ്. ചില മിസൈൽ സംവിധാനങ്ങൾ ആണവായുധ വിതരണ സംവിധാനങ്ങളായും ഉപയോഗിക്കാവുന്ന തരത്തിലാണ് വികസിപ്പിച്ചിട്ടുള്ളതെന്ന് റിപ്പോർട്ടുകൾ ചൂണ്ടിക്കാട്ടുന്നു.