തെലുങ്ക് സിനിമയിലെ പ്രമുഖ നടൻ ടി. ഗോപിചന്ദ് അഭിനയരംഗത്ത് 25 വർഷം പൂർത്തിയാക്കിയതിന്റെ സന്തോഷം ആരാധകരുമായി പങ്കുവെച്ച് ഹൃദയസ്പർശിയായ കുറിപ്പ് പങ്കുവച്ചു. സാമൂഹ്യമാധ്യമങ്ങളിലൂടെയാണ് താരം തന്റെ സിനിമാ യാത്രയെ ഓർത്ത് നന്ദി അറിയിച്ചത്.
“25 വർഷം – ഞാൻ എന്നേക്കും നന്ദിയുള്ളവനായിരിക്കും, ഒരു യാത്ര” എന്ന തലക്കെട്ടോടെയാണ് ഗോപിചന്ദ് കുറിപ്പ് പങ്കുവെച്ചത്. തന്റെ പിതാവിന്റെ അനുഗ്രഹങ്ങളാണ് ഈ യാത്രയുടെ കരുത്തെന്ന് പറഞ്ഞ താരം, ഇതുവരെ ഒപ്പമുണ്ടായിരുന്ന എല്ലാവരോടും കടപ്പാട് രേഖപ്പെടുത്തി.
സിനിമാ ജീവിതം സഫലമാക്കാൻ പിന്തുണ നൽകിയ നിർമ്മാതാക്കൾ, സംവിധായകർ, എഴുത്തുകാർ, സഹനടന്മാർ, സാങ്കേതിക പ്രവർത്തകർ തുടങ്ങി സിനിമാ മേഖലയിലെ ഓരോരുത്തർക്കും താരം പ്രത്യേക നന്ദി അറിയിച്ചു. അവരുടെ വിശ്വാസവും പിന്തുണയും തന്നെയാണ് മുന്നോട്ട് പോകാൻ പ്രചോദനമായതെന്നും അദ്ദേഹം പറഞ്ഞു.
തന്റെ സിനിമകളെ പ്രോത്സാഹിപ്പിക്കുകയും യാത്രയെ പിന്തുണയ്ക്കുകയും ചെയ്ത മാധ്യമപ്രവർത്തകർക്കും ഗോപിചന്ദ് നന്ദി രേഖപ്പെടുത്തി. വർഷങ്ങളായി ലഭിച്ച അഭിനന്ദനങ്ങളും വിമർശനങ്ങളും തന്റെ വളർച്ചയിൽ നിർണായക പങ്കുവഹിച്ചുവെന്നും അദ്ദേഹം കൂട്ടിച്ചേർത്തു.
ആരാധകരെ കുറിച്ച് സംസാരിക്കുമ്പോൾ ഗോപിചന്ദിന്റെ വാക്കുകൾ കൂടുതൽ വികാരനിർഭരമായി. “നിങ്ങൾ നൽകിയ സ്നേഹത്തിനും വിശ്വാസത്തിനും പിന്തുണയ്ക്കും എത്ര നന്ദി പറഞ്ഞാലും മതിയാകില്ല. എന്റെ വിജയങ്ങൾ നിങ്ങൾ ആഘോഷിക്കുകയും ഓരോ ഘട്ടത്തിലും ഒപ്പമുണ്ടാകുകയും ചെയ്തു,” എന്നാണ് താരം കുറിപ്പിൽ രേഖപ്പെടുത്തിയത്.
തെലുങ്ക് പ്രേക്ഷകർക്കും മറ്റ് ഭാഷകളിലെ സിനിമാപ്രേമികൾക്കും വിവിധ താരങ്ങളുടെ ആരാധകർക്കും നന്ദി അറിയിച്ച ഗോപിചന്ദ്, കഴിഞ്ഞ 25 വർഷം പഠനത്തിന്റെയും വളർച്ചയുടെയും മറക്കാനാവാത്ത അനുഭവങ്ങളുടെയും കാലഘട്ടമായിരുന്നുവെന്ന് പറഞ്ഞു. ഇനിയും മികച്ച കഥകളും പ്രകടനങ്ങളുമായി പ്രേക്ഷകരെ സന്തോഷിപ്പിക്കുമെന്ന് വാഗ്ദാനം ചെയ്ത താരം, തന്റെ പുതിയ ചിത്രങ്ങളായ ‘ഭാരതവർഷ’, ‘സിംഗ’ എന്നിവയിലൂടെ ഉടൻ തിയേറ്ററുകളിൽ എത്തുമെന്നും അറിയിച്ചു.
