സെൻട്രൽ ബോർഡ് ഓഫ് ഫിലിം സർട്ടിഫിക്കേഷന്റെ (സിബിഎഫ്‌സി) ഓൺലൈൻ സംവിധാനത്തിലുണ്ടായ സുരക്ഷാവീഴ്ചയിൽ 500-ലധികം സിനിമകളുമായി ബന്ധപ്പെട്ട നിർണായക രേഖകൾ ചോർന്നതായി റിപ്പോർട്ട്. സിനിമകൾക്ക് സെൻസർ സർട്ടിഫിക്കേഷൻ ലഭിക്കുന്നതിനായി നിർമാതാക്കൾ ഉപയോഗിക്കുന്ന ഔദ്യോഗിക പോർട്ടലായ ‘ഇ-സിനിപ്രമാൻ’ വഴിയാണ് രേഖകൾ പുറത്തായതെന്നാണ് വിവരം. സംഭവം സിനിമാ മേഖലയിലെ ഡിജിറ്റൽ സുരക്ഷയെക്കുറിച്ച് ആശങ്ക ഉയർത്തിയിട്ടുണ്ട്.
സിനിമകളുടെ പൂർണ പകർപ്പുകൾ ചോർന്നിട്ടില്ലെങ്കിലും, ഷൂട്ടിങ് സ്ക്രിപ്റ്റുകൾ, സെൻസർ ബോർഡ് നിർദേശിച്ച കട്ട് ഓർഡറുകൾ, തിയേറ്റർ റിലീസിനായി സമർപ്പിച്ച മറ്റ് പ്രധാന രേഖകൾ എന്നിവ ചോർന്നവയിൽ ഉൾപ്പെടുന്നു. സിനിമയുടെ കഥ, കഥാപാത്രങ്ങളുടെ വിശദാംശങ്ങൾ, റിലീസിന് മുമ്പ് നീക്കം ചെയ്ത രംഗങ്ങൾ തുടങ്ങിയ വിവരങ്ങൾ പുറത്താകുന്നത് നിർമാതാക്കൾക്ക് സാമ്പത്തികവും സർഗാത്മകവുമായ നഷ്ടമുണ്ടാക്കാൻ സാധ്യതയുണ്ട്.
ചോർന്ന രേഖകൾ ‘ഇന്റർനെറ്റ് ആർക്കൈവ്’ വെബ്‌സൈറ്റിൽ ഏതാനും ദിവസത്തേക്ക് ഡൗൺലോഡ് ചെയ്യാൻ ലഭ്യമായിരുന്നുവെന്നാണ് റിപ്പോർട്ട്. സംഭവം ശ്രദ്ധയിൽപ്പെട്ടതോടെ വെബ്‌സൈറ്റിൽനിന്ന് രേഖകൾ നീക്കം ചെയ്തതായും വിഷയം സൈബർ സുരക്ഷാ ഉദ്യോഗസ്ഥരുടെ ശ്രദ്ധയിൽപ്പെടുത്തിയതായും റിപ്പോർട്ടുകൾ പറയുന്നു.
സുരക്ഷാവീഴ്ച സംബന്ധിച്ച ആരോപണങ്ങൾ വിശദമായി അന്വേഷിച്ചുവരികയാണെന്ന് സിബിഎഫ്‌സി വ്യക്തമാക്കി. പോർട്ടലിന്റെ സമഗ്ര സുരക്ഷാ ഓഡിറ്റും നടത്തിവരികയാണ്. ഏതെങ്കിലും നിർമാതാവിന്റെ അക്കൗണ്ട് ഹാക്ക് ചെയ്യപ്പെട്ടതായി പ്രാഥമിക അന്വേഷണത്തിൽ തെളിവുകളൊന്നും കണ്ടെത്തിയിട്ടില്ലെന്നും ബോർഡ് അറിയിച്ചു.
ചോർച്ചയ്ക്ക് കാരണമായ സാഹചര്യം എന്താണെന്നും സംഭവത്തിൽ എത്രത്തോളം നാശനഷ്ടമുണ്ടായെന്നും വ്യക്തമാകാൻ വിശദമായ അന്വേഷണം ആവശ്യമാണ്. അന്വേഷണത്തിന്റെ തുടർഫലങ്ങൾ പുറത്തുവരുന്നതോടെ മാത്രമേ സുരക്ഷാവീഴ്ചയുടെ വ്യാപ്തി പൂർണമായി മനസ്സിലാക്കാനാകൂ.
