മനുഷ്യന്റെ ചന്ദ്രപര്യവേക്ഷണം വ്യാപകമാകുന്നതിനിടെ ചന്ദ്രനിൽ അടിഞ്ഞുകൂടുന്ന മനുഷ്യനിർമിത മാലിന്യങ്ങൾ ശാസ്ത്രജ്ഞരിൽ ആശങ്കയുണർത്തുന്നു. അടുത്തിടെ സ്പേസ് എക്സിന്റെ ഫാൽക്കൺ 9 റോക്കറ്റിന്റെ ഒരു ഭാഗം ചന്ദ്രനിൽ പതിച്ചതോടെ വിഷയം വീണ്ടും ശ്രദ്ധയിൽപ്പെട്ടു.
നിലവിൽ ഏകദേശം 3,000 മനുഷ്യനിർമിത വസ്തുക്കളും 200 ടണ്ണിലധികം മാലിന്യങ്ങളും ചന്ദ്രോപരിതലത്തിൽ ഉണ്ടെന്നാണ് കണക്ക്. അപ്പോളോ ദൗത്യങ്ങളുടെ അവശിഷ്ടങ്ങൾ മുതൽ റോക്കറ്റ് ഭാഗങ്ങൾ വരെ ഇതിൽ ഉൾപ്പെടുന്നു.
ചന്ദ്രനിൽ മാലിന്യ നിയന്ത്രണത്തിനായി വ്യക്തമായ അന്താരാഷ്ട്ര നിയമങ്ങൾ ഇല്ലാത്തതും ആശങ്ക വർധിപ്പിക്കുന്ന ഘടകമാണ്. റോക്കറ്റുകൾ പതിക്കുമ്പോൾ ഉയരുന്ന ചാന്ദ്രധൂളി ഭാവിയിലെ ഗവേഷണ കേന്ദ്രങ്ങൾക്കും ശാസ്ത്രീയ പഠനങ്ങൾക്കും ഭീഷണിയാകാമെന്ന് വിദഗ്ധർ മുന്നറിയിപ്പ് നൽകുന്നു.
ചന്ദ്രന്റെ സ്വാഭാവിക പരിസ്ഥിതി സംരക്ഷിക്കാൻ കർശനമായ അന്താരാഷ്ട്ര ബഹിരാകാശ മാലിന്യ നിയന്ത്രണ നയങ്ങൾ അനിവാര്യമാണെന്നാണ് ശാസ്ത്രലോകത്തിന്റെ വിലയിരുത്തൽ.
