പനീറിന്റെ പേരിൽ വിൽക്കുന്ന പാൽ ഇതര ഉൽപ്പന്നങ്ങൾക്കെതിരെ കർശന നടപടികളുമായി കേന്ദ്ര സർക്കാർ. രാജ്യത്തുടനീളം ‘അനലോഗ് പനീർ’ എന്നറിയപ്പെടുന്ന പാൽ ഇതര ഉൽപ്പന്നങ്ങളുടെ നിർമ്മാണവും വിൽപ്പനയും നിരോധിക്കുന്നതിനുള്ള നിർദേശവുമായി ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) രംഗത്തെത്തി. ഇതുമായി ബന്ധപ്പെട്ട കരട് ചട്ടങ്ങൾ പൊതുജനാഭിപ്രായത്തിനായി പുറത്തിറക്കി.
പനീറിന്റെ സ്വഭാവത്തെക്കുറിച്ചും അതിൽ ഉപയോഗിക്കുന്ന ചേരുവകളെക്കുറിച്ചും ഉപഭോക്താക്കൾക്ക് തെറ്റിദ്ധാരണ ഉണ്ടാകാതിരിക്കാനാണ് നിർദേശിച്ച മാറ്റങ്ങളെന്ന് FSSAI വ്യക്തമാക്കി. നിലവിൽ ‘അനലോഗ് ഇൻ ഡയറി കോൺടെക്സ്റ്റ്സ്’ വിഭാഗത്തിൽ ലൈസൻസോ രജിസ്ട്രേഷനോ നേടിയിട്ടുള്ള ഉൽപ്പന്നങ്ങളുടെ പേരിലോ ലേബലിലോ വിപണനത്തിലോ ‘പനീർ’ എന്ന വാക്ക് ഉപയോഗിക്കുന്നത് വിലക്കാനാണ് കരടിൽ നിർദേശിച്ചിരിക്കുന്നത്.
ഭക്ഷ്യ സുരക്ഷയും മാനദണ്ഡങ്ങളും സംബന്ധിച്ച വിൽപ്പനയിലെ നിരോധനങ്ങളും നിയന്ത്രണങ്ങളും ഉൾപ്പെടുന്ന ചട്ടങ്ങളിൽ പുതിയ വ്യവസ്ഥകൾ ഉൾപ്പെടുത്താനാണ് FSSAI നീക്കം. കരട് ചട്ടങ്ങളിൽ പൊതുജനങ്ങൾക്ക് 60 ദിവസത്തിനുള്ളിൽ അഭിപ്രായങ്ങളും നിർദേശങ്ങളും സമർപ്പിക്കാം. അനലോഗ് പനീറിന്റെ നിർമ്മാണവും വിൽപ്പനയും സംബന്ധിച്ച നിയന്ത്രണങ്ങൾ ഇതിനകം നിലവിലുണ്ടെന്നും അധികൃതർ വ്യക്തമാക്കുന്നു.
അതിനിടെ, അനലോഗ് പനീറിനെതിരെ വിവിധ സംസ്ഥാനങ്ങളും നടപടികൾ ശക്തമാക്കിയിട്ടുണ്ട്. മഹാരാഷ്ട്രയിൽ കൃത്രിമ അനലോഗ് പനീറിന്റെ നിർമ്മാണം, വിതരണം, വിൽപ്പന എന്നിവയ്ക്ക് ഒരു വർഷത്തേക്ക് നിരോധനം ഏർപ്പെടുത്തിയിരുന്നു. സംസ്ഥാനത്ത് അടുത്തിടെ പരിശോധിച്ച പനീർ സാമ്പിളുകളിൽ 35 ശതമാനത്തിലധികം ഗുണനിലവാര പരിശോധനയിൽ പരാജയപ്പെട്ടിരുന്നു. പച്ചക്കറി കൊഴുപ്പ് ഉൾപ്പെടെയുള്ള ചേരുവകൾ ഉപയോഗിച്ച് മായം ചേർത്തതായി കണ്ടെത്തിയതിനെ തുടർന്നായിരുന്നു നടപടി.
ഗുജറാത്തിലും നിലവാരമില്ലാത്ത അനലോഗ് പനീർ, ചീസ്, വെണ്ണ എന്നിവയുടെ നിർമ്മാണം, സംഭരണം, ഗതാഗതം, വിതരണം, വിൽപ്പന എന്നിവയ്ക്ക് സംസ്ഥാനതലത്തിൽ നിയന്ത്രണം ഏർപ്പെടുത്തിയിട്ടുണ്ട്.
സസ്യ എണ്ണയും മറ്റ് പാൽ ഇതര ചേരുവകളും ഉപയോഗിച്ച് നിർമ്മിക്കുന്ന ഉൽപ്പന്നങ്ങൾ പനീർ എന്ന പേരിൽ വിപണിയിലെത്തുന്നത് ഉപഭോക്താക്കളെ തെറ്റിദ്ധരിപ്പിക്കാനുള്ള സാധ്യതയുണ്ടെന്നാണ് അധികൃതരുടെ വിലയിരുത്തൽ. ഇത്തരം ഉൽപ്പന്നങ്ങളുടെ വിൽപ്പന യഥാർത്ഥ പാലുൽപ്പന്നങ്ങളുടെ നിർമ്മാതാക്കളെ ബാധിക്കുന്നതിനൊപ്പം ഭക്ഷ്യസുരക്ഷ സംബന്ധിച്ച ആശങ്കകൾക്കും ഇടയാക്കുന്നതായാണ് ചൂണ്ടിക്കാട്ടുന്നത്.
