യുവതാരം വൈഭവ് സൂര്യവംശിക്ക് ഇന്ത്യൻ ക്രിക്കറ്റിൽ വലിയ സ്വാധീനം ചെലുത്താൻ കഴിവുണ്ടെന്ന് ടി20 ക്യാപ്റ്റൻ ശ്രേയസ് അയ്യർ. എന്നാൽ താരത്തിന്റെ അതിവേഗ വളർച്ചയെ കളിയിലെ പ്രകടനങ്ങളുമായി മാത്രം ബന്ധപ്പെടുത്തി കാണരുതെന്നും അയ്യർ വ്യക്തമാക്കി.
വെസ്റ്റ് ഇൻഡീസിനെതിരായ അഞ്ച് മത്സരങ്ങളുള്ള ടി20 പരമ്പരയ്ക്ക് മുന്നോടിയായി സംസാരിക്കുകയായിരുന്നു ശ്രേയസ് അയ്യർ. ക്രിക്കറ്റിന് പുറത്തുള്ള ജീവിതത്തെക്കുറിച്ച് സംസാരിച്ചുകൊണ്ട് വൈഭവ് സൂര്യവംശിയുമായി വ്യക്തിപരമായ ബന്ധം സ്ഥാപിക്കാൻ താൻ ശ്രമിക്കാറുണ്ടെന്നും അയ്യർ പറഞ്ഞു.
‘എല്ലാവരും വൈഭവിനോട് ക്രിക്കറ്റിനെക്കുറിച്ച് മാത്രമാണ് സംസാരിക്കുന്നത്. എന്നാൽ കളിക്കളത്തിന് പുറത്ത് അദ്ദേഹം എന്താണ് ചെയ്യുന്നതെന്നും കുടുംബത്തെക്കുറിച്ചും ജീവിതത്തെക്കുറിച്ചുമൊക്കെ ഞാൻ സംസാരിക്കാറുണ്ട്. ഒരു വ്യക്തിയെന്ന നിലയിൽ അദ്ദേഹം എത്രത്തോളം കഴിവുള്ളവനും പ്രതിഭാധനനുമാണെന്ന് ഞങ്ങൾക്കറിയാം. ഇത്തരം കാര്യങ്ങൾ സംസാരിക്കുമ്പോൾ അദ്ദേഹം കൂടുതൽ തുറന്നുപറയുകയും കൂടുതൽ ഉന്മേഷവാനാകുകയും ചെയ്യുന്നു,’ അയ്യർ പറഞ്ഞു.
വളരെ ശാന്തനായ വ്യക്തിയാണ് വൈഭവ്, എന്നാൽ കളിക്കളത്തിൽ അതീവ ആക്രമണാത്മകവും വിനാശകാരിയുമായ താരമാണെന്നും അയ്യർ ചൂണ്ടിക്കാട്ടി. ഡ്രസ്സിംഗ് റൂമിൽ അദ്ദേഹത്തിന്റെ സാന്നിധ്യം സന്തോഷകരമാണെന്നും ക്യാപ്റ്റൻ പറഞ്ഞു.
അടുത്ത ടി20 ലോകകപ്പിനുള്ള തയ്യാറെടുപ്പുകളുടെ ഭാഗമായി ഇന്ത്യൻ ടീമിന്റെ ഭാഗമാണ് വൈഭവ് സൂര്യവംശി. എന്നാൽ താരത്തെ വലിയ ഉത്തരവാദിത്തങ്ങളിലേക്ക് പെട്ടെന്ന് എത്തിക്കേണ്ടതില്ലെന്നാണ് അയ്യറിന്റെ നിലപാട്.
‘അവന്റെ സമയം തീർച്ചയായും വരും. ഇപ്പോൾ നമ്മൾ ലോകകപ്പ് ജേതാക്കളായ ഓപ്പണർമാരോടൊപ്പമാണ് കളിക്കുന്നത്. അവർ ആ അവസരത്തിന് അർഹരാണ്. വൈഭവ് ഇപ്പോഴും 15 വയസ്സുകാരനാണ്. അതിനാൽ അവന്റെ സമയം വരുമ്പോൾ ഇന്ത്യൻ ക്രിക്കറ്റിൽ അവൻ ആധിപത്യം സ്ഥാപിക്കുമെന്ന് എനിക്ക് ഉറപ്പുണ്ട്,’ അയ്യർ ജിയോസ്റ്റാറിനോട് പറഞ്ഞു.
