സൗദി അറേബ്യ, പാകിസ്ഥാൻ, തുർക്കി എന്നീ രാജ്യങ്ങൾ തമ്മിലുള്ള ‘മക്ക പരസ്പര പ്രതിരോധ കരാർ’ പ്രാബല്യത്തിൽ വന്നു. പുതിയ പ്രതിരോധ സഖ്യത്തിന്റെ ഭാഗമായി സൗദി അറേബ്യ നേരിടുന്ന സുരക്ഷാ ഭീഷണികളുടെ പശ്ചാത്തലത്തിൽ പാകിസ്ഥാനും തുർക്കിയും സൈനിക ശക്തികളും പ്രതിരോധ ശേഷികളും വേഗത്തിൽ സൗദിയിലേക്ക് വിന്യസിക്കാൻ തയ്യാറാകുമെന്ന് വ്യക്തമാക്കി.
ഒക്ടോബർ 5ന് റിയാദിൽ ചേർന്ന മക്ക അലയൻസ് ഫോർ ഡിഫൻസിന്റെ തന്ത്രപരമായ-രാഷ്ട്രീയ, പ്രതിരോധ കമ്മിറ്റിയുടെ അടിയന്തര യോഗത്തിലാണ് നിർണായക തീരുമാനങ്ങൾ കൈക്കൊണ്ടത്. കരാറിലെ കൂട്ടായ പ്രതിരോധ ഉറപ്പുകൾ ഉടൻ നടപ്പാക്കാനും സൗദിയിലേക്ക് സൈനിക സേനയെ വേഗത്തിൽ വിന്യസിക്കുന്നതിനുള്ള നടപടികൾ സ്വീകരിക്കാനും യോഗം തീരുമാനിച്ചതായി പാകിസ്ഥാൻ വിദേശകാര്യ മന്ത്രാലയം പുറത്തിറക്കിയ സംയുക്ത പ്രസ്താവനയിൽ അറിയിച്ചു.
മൂന്ന് രാജ്യങ്ങളും തമ്മിലുള്ള സൈനിക തയ്യാറെടുപ്പ് ശക്തിപ്പെടുത്തുക, പ്രതിരോധ ഏകോപനം മെച്ചപ്പെടുത്തുക, ഉയർന്നുവരുന്ന സുരക്ഷാ ഭീഷണികളെ സംയുക്തമായി നേരിടാനുള്ള ശേഷി വർധിപ്പിക്കുക എന്നിവയാണ് കരാറിന്റെ പ്രധാന ലക്ഷ്യങ്ങൾ. സൈനിക വിന്യാസം മൂന്ന് രാജ്യങ്ങളും തമ്മിൽ അംഗീകരിച്ച ക്രമീകരണങ്ങൾക്കും അതത് രാജ്യങ്ങളിലെ നിയമങ്ങൾക്കും അനുസൃതമായിരിക്കുമെന്നും പ്രസ്താവനയിൽ വ്യക്തമാക്കി.
മക്കയും മദീനയും ലക്ഷ്യമിട്ടുള്ള ആക്രമണശ്രമങ്ങൾക്കു പുറമെ സൗദിയിലെ നഗരങ്ങൾ, സിവിലിയൻ കേന്ദ്രങ്ങൾ, സാമ്പത്തിക സ്ഥാപനങ്ങൾ എന്നിവയ്ക്കെതിരായ ആക്രമണങ്ങളെയും മൂന്ന് രാജ്യങ്ങളും അപലപിച്ചു. രാജ്യത്തിന്റെ സുരക്ഷയും പ്രദേശിക സമഗ്രതയും സംരക്ഷിക്കുന്നതിൽ സൗദി സായുധ സേനയുടെ ജാഗ്രതയെയും തയ്യാറെടുപ്പിനെയും നേതാക്കൾ പ്രശംസിച്ചു.
മൂന്ന് രാജ്യങ്ങളിൽ നിന്നുള്ള ഉന്നതതല പ്രതിരോധ, സൈനിക ഉദ്യോഗസ്ഥരാണ് റിയാദിലെ യോഗത്തിൽ പങ്കെടുത്തത്. തുർക്കിയെ പ്രതിനിധീകരിച്ച് വിദേശകാര്യ മന്ത്രി ഹകാൻ ഫിദാൻ, പ്രതിരോധ മന്ത്രി യാസർ ഗുലർ, ചീഫ് ഓഫ് ജനറൽ സ്റ്റാഫ് ജനറൽ സെലുക് ബെയ്‌റക്തറോഗ്ലു എന്നിവർ പങ്കെടുത്തു.
പാകിസ്ഥാനിൽ നിന്ന് ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാർ, സൈനിക മേധാവി ഫീൽഡ് മാർഷൽ അസിം മുനീർ, പ്രതിരോധ മന്ത്രി ഖവാജ മുഹമ്മദ് ആസിഫ് എന്നിവർ യോഗത്തിലെത്തി. സൗദിയെ പ്രതിനിധീകരിച്ച് വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാൻ അൽ സൗദ്, പ്രതിരോധ മന്ത്രി പ്രിൻസ് ഖാലിദ് ബിൻ സൽമാൻ, ചീഫ് ഓഫ് ജനറൽ സ്റ്റാഫ് ജനറൽ ഫയാദ് ബിൻ ഹമദ് അൽ-റുവൈലി എന്നിവർ പങ്കെടുത്തു.
പാകിസ്ഥാനിൽ നിന്നുള്ള വിരമിച്ച ലെഫ്റ്റനന്റ് ജനറൽ നൗമാൻ മഹമൂദിനെ സഖ്യത്തിന്റെ ആദ്യ സെക്രട്ടറി ജനറലായി നിയമിച്ചു. മൂന്ന് വർഷമാണ് അദ്ദേഹത്തിന്റെ കാലാവധി. സഖ്യത്തിലെ ഓരോ അംഗരാജ്യത്തിന്റെയും സുരക്ഷ മറ്റ് അംഗരാജ്യങ്ങളുടെ കൂട്ടായ സുരക്ഷയുടെ അവിഭാജ്യ ഘടകമാണെന്നും മൂന്ന് രാജ്യങ്ങളും വ്യക്തമാക്കി.
ഓഗസ്റ്റിൽ ഒപ്പുവച്ച കരാർ
ഈ വർഷം ഓഗസ്റ്റ് 7നാണ് സൗദി അറേബ്യ, പാകിസ്ഥാൻ, തുർക്കി എന്നിവർ മക്ക പരസ്പര പ്രതിരോധ കരാറിൽ ഒപ്പുവച്ചത്. കരാർ പ്രകാരം സഖ്യത്തിലെ ഏതെങ്കിലും ഒരു രാജ്യത്തിനെതിരായ സായുധ ആക്രമണം മൂന്ന് രാജ്യങ്ങൾക്കും എതിരായ ആക്രമണമായി കണക്കാക്കും.
കരാർ പ്രാവർത്തികമാക്കുന്നതിനുള്ള സ്ഥാപനപരമായ ക്രമീകരണങ്ങളുടെ ഭാഗമായി ഓഗസ്റ്റിൽ ഇസ്താംബൂളിലും സെപ്റ്റംബർ 25ന് റിയാദിലും ചർച്ചകൾ നടന്നിരുന്നു. പുതിയ തീരുമാനങ്ങളോടെ സഖ്യം കൂടുതൽ സജീവമായ പ്രതിരോധ സംവിധാനമായി മാറുകയാണ്. സൗദി അറേബ്യ നേരിടുന്ന സുരക്ഷാ ഭീഷണികളെ മൂന്ന് രാജ്യങ്ങളും ചേർന്ന് നേരിടുമെന്ന ശക്തമായ സന്ദേശമാണ് ഇതിലൂടെ നൽകുന്നതെന്നാണ് വിലയിരുത്തൽ.
