ബോളിവുഡ് നടി സാറാ അലി ഖാൻ കേദാർനാഥ് ക്ഷേത്രത്തിൽ ദർശനം നടത്തിയതിനെതിരെ മുസ്ലീം പുരോഹിതൻ ഫത്‌വ പുറപ്പെടുവിച്ചതിനെ വിമർശിച്ച് പർമാർഥ് നികേതൻ ആശ്രമം മേധാവി സ്വാമി ചിദാനന്ദ സരസ്വതി. ശരിയായ പാത പിന്തുടരുന്നവർക്കെതിരെ ഫത്‌വ പുറപ്പെടുവിക്കുന്നത് അംഗീകരിക്കാനാകില്ലെന്ന് അദ്ദേഹം പറഞ്ഞു. വെള്ളിയാഴ്ച ഹരിദ്വാറിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
സമൂഹത്തിന്റെ ക്ഷേമത്തിനായി പ്രവർത്തിക്കുകയും നന്മ ചെയ്യുകയും ചെയ്യുന്നവരെ അഭിനന്ദിക്കുകയാണ് വേണ്ടതെന്നും അവരെ ഫത്‌വകളിലൂടെ ലക്ഷ്യമിടരുതെന്നും സ്വാമി ചിദാനന്ദ വ്യക്തമാക്കി. ആരെങ്കിലും തെറ്റ് ചെയ്താൽ വിമർശിക്കുന്നതിൽ അർത്ഥമുണ്ടെങ്കിലും ശരിയായ കാര്യങ്ങൾ ചെയ്യുന്നവർക്കെതിരെ ഇത്തരം നടപടികൾ സ്വീകരിക്കുന്നത് മനസ്സിലാക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
അഖിലേന്ത്യാ മുസ്ലിം ജമാഅത്ത് ദേശീയ പ്രസിഡന്റ് മൗലാന ഷഹാബുദ്ദീൻ റസ്വി ബരേൽവിയാണ് സാറയുടെ കേദാർനാഥ് ദർശനത്തിനെതിരെ ഫത്‌വ പുറപ്പെടുവിച്ചത്. ക്ഷേത്രത്തിൽ സന്ദർശനം നടത്തി ആരാധന നടത്തിയത് ഇസ്ലാമിക വിശ്വാസപ്രകാരം നിഷിദ്ധമാണെന്നും സാറ പശ്ചാത്തപിക്കണമെന്നുമായിരുന്നു അദ്ദേഹത്തിന്റെ പ്രതികരണം.
അതേസമയം, വിഷയത്തിൽ അഖില ഭാരതീയ സന്ത് സമിതി ജനറൽ സെക്രട്ടറി സ്വാമി ജിതേന്ദ്രാനന്ദ സരസ്വതിയും പ്രതികരിച്ചു. മുസ്ലീം സ്ത്രീകൾ ക്ഷേത്രങ്ങൾ സന്ദർശിക്കുന്നത് തടയാൻ മതനേതാക്കൾക്ക് കഴിയുമെന്നായിരുന്നു അദ്ദേഹത്തിന്റെ പരാമർശം. മുസ്ലീം യുവാക്കൾ ദണ്ഡിയ ആഘോഷങ്ങളിൽ പങ്കെടുക്കുമ്പോൾ അവരുടെ കുടുംബങ്ങളിലെ സ്ത്രീകൾക്ക് എന്തുകൊണ്ട് പങ്കെടുക്കാനാകില്ലെന്നും അദ്ദേഹം ചോദിച്ചു.
