സൈബർ സുരക്ഷാ ഗവേഷണ രംഗത്ത് പുതിയ ചുവടുവയ്പ്പുമായി ആർട്ടിഫിഷ്യൽ ഇന്റലിജൻസ് (AI) കമ്പനിയായ ഓപ്പൺഎഐ. സോഫ്റ്റ്‌വെയറുകളിലെയും ഓപ്പറേറ്റിംഗ് സിസ്റ്റങ്ങളിലെയും സുരക്ഷാ ദുർബലതകൾ കണ്ടെത്താനും അവ എങ്ങനെ ദുരുപയോഗം ചെയ്യപ്പെടാമെന്ന് പരിശോധിക്കാനും ശേഷിയുള്ള ‘GPT-6 സൈബർ’ എന്ന പുതിയ എഐ മോഡൽ അവതരിപ്പിച്ചതായാണ് റിപ്പോർട്ട്. മോഡലിന്റെ ഉയർന്ന ശേഷി കണക്കിലെടുത്ത് ഓപ്പൺഎഐയുടെ സുരക്ഷാ ചട്ടക്കൂടിൽ ഇതിന് ‘നിർണായക’ റേറ്റിങ് നൽകിയിട്ടുണ്ട്.
നവംബർ 5 വ്യാഴാഴ്ച തിരഞ്ഞെടുത്ത സൈബർ സുരക്ഷാ വിദഗ്ധർക്ക് ലഭ്യമാക്കിയ മോഡൽ ഇതിനകം നിരവധി സുരക്ഷാ പിഴവുകൾ കണ്ടെത്തിയതായാണ് കമ്പനി അറിയിച്ചിരിക്കുന്നത്. ഫയർഫോക്സ് ബ്രൗസറിൽ മുമ്പ് തിരിച്ചറിഞ്ഞിട്ടില്ലാത്ത 81 ഗുരുതര സുരക്ഷാ പിഴവുകൾ കണ്ടെത്തി. ഇതിന്റെ അടിസ്ഥാനത്തിൽ മോസില്ല പരിഹാര നടപടികൾ ആരംഭിച്ചിട്ടുണ്ട്. ലിനക്സ് കേർണലിൽ 948 പിഴവുകളും മോഡൽ കണ്ടെത്തി. ഇതിൽ 588 എണ്ണം നേരത്തെ അറിയപ്പെടാത്തവയായിരുന്നു. നിർണായകമായ 304 പിഴവുകളുടെ വിശദാംശങ്ങളും പരിഹാര നിർദേശങ്ങളും ബന്ധപ്പെട്ട ഡെവലപ്പർമാർക്ക് കൈമാറിയതായും റിപ്പോർട്ടിൽ പറയുന്നു.
മോഡലിന്റെ കഴിവുകളും അതുമായി ബന്ധപ്പെട്ട സുരക്ഷാ ആശങ്കകളും കണക്കിലെടുത്ത് പൊതുജനങ്ങൾക്ക് നേരിട്ട് ലഭ്യമാക്കില്ലെന്നാണ് ഓപ്പൺഎഐയുടെ നിലപാട്. സൈബർ സുരക്ഷാ ഗവേഷണത്തിനായി ഒരുക്കിയ ‘ഡേബ്രേക്ക് റെഡ്’ പ്ലാറ്റ്‌ഫോമിലൂടെ തിരഞ്ഞെടുത്ത ഉപഭോക്താക്കൾക്കാണ് നിലവിൽ പ്രവേശനം. വരും ആഴ്ചകളിൽ പ്ലാറ്റ്‌ഫോമിലെ അംഗീകൃത വിദഗ്ധർക്കെല്ലാം മോഡൽ ലഭ്യമാക്കുമെന്നും കമ്പനി അറിയിച്ചു. ഇതിന്റെ മുൻ പതിപ്പായ GPT-5.6 സൈബർ നവംബർ 5 മുതൽ എല്ലാ ഡേബ്രേക്ക് റെഡ് ഉപഭോക്താക്കൾക്കും ലഭ്യമാക്കിയിട്ടുണ്ട്.
എഐ സാങ്കേതികവിദ്യ ഹാക്കർമാരും സൈബർ കുറ്റവാളികളും ദുരുപയോഗം ചെയ്യാനുള്ള ശ്രമങ്ങൾ വർധിക്കുന്ന സാഹചര്യത്തിലാണ് പുതിയ മോഡൽ അവതരിപ്പിക്കുന്നതെന്ന് ഓപ്പൺഎഐ വ്യക്തമാക്കി. കുറ്റവാളികൾക്ക് മുമ്പ് തന്നെ സോഫ്റ്റ്‌വെയറുകളിലെ സുരക്ഷാ പിഴവുകൾ കണ്ടെത്തി പരിഹരിക്കാൻ വിദഗ്ധരെ സഹായിക്കുന്ന ഉപകരണമായാണ് GPT-6 സൈബറിനെ കമ്പനി അവതരിപ്പിക്കുന്നത്.
