പഴയ പ്രണയിനിയെക്കുറിച്ച് തുറന്നുപറഞ്ഞ് രാഹുൽ ഗാന്ധി; ‘ഇപ്പോൾ നല്ല സുഹൃത്ത് മാത്രം’

തന്റെ വ്യക്തിജീവിതത്തിലെ രസകരമായ ഓർമകൾ പങ്കുവെച്ച് കോൺഗ്രസ് നേതാവും ലോക്‌സഭാ പ്രതിപക്ഷ നേതാവുമായ രാഹുൽ ഗാന്ധി. അമ്മ സോണിയ ഗാന്ധിയുടെ പുസ്തകമായ ‘ബിലോങ്ങിംഗ്: എ ജേർണി ഓഫ് ലവ്’ പ്രകാശനച്ചടങ്ങിൽ സംസാരിക്കവെയാണ് കേംബ്രിഡ്ജ് സർവകലാശാലയിൽ പഠിച്ചിരുന്ന കാലത്തെ പ്രണയത്തെക്കുറിച്ചും അദ്ദേഹം വെളിപ്പെടുത്തിയത്. അന്നത്തെ കാമുകിക്കൊപ്പം മാതാപിതാക്കൾ ആദ്യമായി കണ്ടുമുട്ടിയ റെസ്റ്റോറന്റിൽ പോയ അനുഭവവും രാഹുൽ പങ്കുവെച്ചു.

കേംബ്രിഡ്ജിലെ ‘ദി വാഴ്‌സിറ്റി റെസ്റ്റോറന്റ്’ സന്ദർശിച്ചപ്പോഴുണ്ടായ അനുഭവമാണ് അദ്ദേഹം വിവരിച്ചത്. രാജീവ് ഗാന്ധിയും സോണിയ ഗാന്ധിയും ആദ്യമായി കണ്ടുമുട്ടിയ സ്ഥലമാണിത്. അന്നത്തെ കാമുകിക്കൊപ്പമാണ് രാഹുൽ അവിടെയെത്തിയത്. ഭക്ഷണം ഓർഡർ ചെയ്യുന്നതിനിടെ മാതാപിതാക്കളെക്കുറിച്ച് പരാമർശിച്ചപ്പോൾ റെസ്റ്റോറന്റിലെ ജീവനക്കാർ പതിറ്റാണ്ടുകൾക്കു ശേഷവും ഇരുവരെയും ഓർത്തിരിക്കുന്നതായി മനസ്സിലാക്കി താൻ അത്ഭുതപ്പെട്ടുവെന്ന് അദ്ദേഹം പറഞ്ഞു.

പിന്നീട് അന്നത്തെ കാമുകിയെക്കുറിച്ച് ചോദിച്ചപ്പോൾ, പുഞ്ചിരിയോടെ ‘അവർ ഇപ്പോൾ എനിക്ക് നല്ലൊരു സുഹൃത്ത് മാത്രമാണ്’ എന്നായിരുന്നു രാഹുലിന്റെ മറുപടി.

ചടങ്ങിൽ സോണിയ ഗാന്ധിയുടെ ആരോഗ്യത്തെക്കുറിച്ചുള്ള വിവരങ്ങളും രാഹുൽ പങ്കുവെച്ചു. അമ്മ നാല് തവണ കാൻസറിനെ അതിജീവിച്ചിട്ടുണ്ടെന്ന് അദ്ദേഹം വെളിപ്പെടുത്തി. ജീവിതത്തിലെ ഏറ്റവും പ്രയാസകരമായ സാഹചര്യങ്ങളിലും ഭയപ്പെടാതെ മുന്നോട്ടുപോകാനുള്ള സോണിയയുടെ മനക്കരുത്തിനെയും അദ്ദേഹം പ്രശംസിച്ചു.

1991ൽ രാജീവ് ഗാന്ധി കൊല്ലപ്പെട്ടതിനു പിന്നാലെ സുരക്ഷാ കാരണങ്ങളാൽ രാഹുലിന്റെ പഠനസ്ഥാപനം മാറ്റേണ്ടിവന്നതിനെക്കുറിച്ചും ചടങ്ങിൽ സോണിയ ഗാന്ധി ഓർത്തെടുത്തു. ഹാർവാർഡിൽ പഠിച്ചിരുന്ന രാഹുലിനെ പിന്നീട് മറ്റൊരു അമേരിക്കൻ കോളേജിലേക്ക് മാറ്റുകയായിരുന്നു. സുരക്ഷാ പ്രശ്നങ്ങൾ കാരണം യഥാർഥ പേരിൽ പഠനം തുടരേണ്ടതില്ലാത്ത സാഹചര്യവും അന്നുണ്ടായിരുന്നുവെന്ന് സോണിയ വ്യക്തമാക്കി.

മറുപടി രേഖപ്പെടുത്തുക