പിഎസ്‌സി ചെയർമാൻ ഉൾപ്പെടെയുള്ളവർക്കെതിരെ നടപടിക്ക് കേന്ദ്ര സർക്കാരിനോട് ശുപാർശ ചെയ്ത ഗവർണറുടെ നടപടിയെ വിമർശിച്ച് മുഖ്യമന്ത്രി വി.ഡി. സതീശൻ. സർക്കാർ കൂടിയാലോചനയോ അനുമതിയോ തേടാതെയാണ് ഗവർണർ ശുപാർശ നൽകിയതെന്നും നടപടിക്രമങ്ങൾ പാലിച്ചിട്ടില്ലെന്നും മുഖ്യമന്ത്രി ആരോപിച്ചു.
അതേസമയം, പിഎസ്‌സിയിൽ ക്രമവിരുദ്ധ പ്രവർത്തനങ്ങൾ നടന്നിട്ടുണ്ടെന്ന് സമ്മതിച്ച മുഖ്യമന്ത്രി, അവയ്‌ക്കെതിരെ ശുദ്ധീകരണ നടപടി സ്വീകരിക്കുമെന്ന് വ്യക്തമാക്കി. ഗവർണർ ശുപാർശ നൽകിയെന്നതിന്റെ പേരിൽ പിഎസ്‌സിയിലെ എല്ലാവരെയും സംരക്ഷിക്കാനാണ് പ്രതിപക്ഷം ശ്രമിക്കുന്നതെന്നും അദ്ദേഹം വിമർശിച്ചു. ഗവർണറുടെ നടപടിയും പിഎസ്‌സിയിലെ ക്രമക്കേടുകളും രണ്ടായി കാണേണ്ട വിഷയങ്ങളാണെന്നും സ്ഥാപനത്തിന്റെ വിശ്വാസ്യത വീണ്ടെടുക്കാൻ സർക്കാർ നടപടി സ്വീകരിക്കുമെന്നും മുഖ്യമന്ത്രി പറഞ്ഞു.
പിഎസ്‌സിക്കെതിരെ നിരവധി പരാതികൾ ലഭിക്കുന്നുണ്ടെന്നും മുഖ്യമന്ത്രി വെളിപ്പെടുത്തി. അന്വേഷണവും നടപടികളും ശരിയായ രീതിയിൽ മുന്നോട്ടുപോകുന്നുവെന്ന് ബോധ്യപ്പെട്ടതോടെ നേരത്തെ പരാതിപ്പെടാൻ മടിച്ചിരുന്നവരും രംഗത്തെത്തുന്നുണ്ട്. ഗൗരവകരമായ നിരവധി പരാതികളാണ് ലഭിച്ചുകൊണ്ടിരിക്കുന്നത്. കുറ്റക്കാരെ കണ്ടെത്തി നിയമത്തിന് മുന്നിൽ കൊണ്ടുവരുമെന്നും മുഖ്യമന്ത്രി ആവർത്തിച്ചു.
അതിനിടെ, ആരോഗ്യവകുപ്പിൽ പുതിയ തസ്തികകൾ അനുവദിക്കാനും മന്ത്രിസഭാ യോഗം അംഗീകാരം നൽകി. ഡെന്റൽ ഹൈജീനിസ്റ്റ് ഗ്രേഡ്-2 വിഭാഗത്തിൽ 12 അധിക തസ്തികകളും കാത്ത് ലാബ് ടെക്നീഷ്യൻ ഗ്രേഡ്-2 വിഭാഗത്തിൽ 16 തസ്തികകളുമാണ് അനുവദിച്ചത്.
