റഷ്യയിലെ ആർട്ടിക് മേഖലയിൽ രണ്ട് ദ്വീപസമൂഹങ്ങൾക്ക് സമീപം പുതിയ ദ്വീപുകൾ രൂപപ്പെടാൻ സാധ്യതയുണ്ടെന്ന് ഗവേഷകൻ. പിൻവാങ്ങുന്ന ഹിമാനികൾക്ക് കീഴിൽ മറഞ്ഞുകിടക്കുന്ന ഭൂഭാഗങ്ങൾ പുറത്തുവരുന്നതോടെയാണ് പുതിയ ഭൂസവിശേഷതകൾ പ്രത്യക്ഷപ്പെടാൻ സാധ്യതയുള്ളതെന്ന് സെന്റ് പീറ്റേഴ്സ്ബർഗിലെ അഡ്മിറൽ മകരോവ് സ്റ്റേറ്റ് യൂണിവേഴ്സിറ്റി ഓഫ് മാരിടൈം ആൻഡ് ഇൻലാൻഡ് ഷിപ്പിംഗിലെ ആർട്ടിക് പഠന വിഭാഗം മേധാവി ആൻഡ്രി ലിയോനോവ് പറഞ്ഞു.
റഷ്യൻ തീരദേശ നഗരമായ അർഖാൻഗെൽസ്കിന് വടക്കുകിഴക്കായി സ്ഥിതി ചെയ്യുന്ന നോവയ സെംല്യ, അതിന് ഏകദേശം 350 കിലോമീറ്റർ വടക്കുള്ള ഫ്രാൻസ് ജോസഫ് ലാൻഡ് എന്നിവിടങ്ങളിലാണ് പുതിയ ദ്വീപുകൾ രൂപപ്പെടാനുള്ള സാധ്യത കൂടുതലെന്ന് ലിയോനോവ് ചൂണ്ടിക്കാട്ടി. ഹൈഡ്രോഗ്രാഫർമാർക്ക് ഈ പ്രദേശങ്ങൾ പ്രത്യേക താൽപ്പര്യമുള്ളതാണെന്നും അദ്ദേഹം ആർഐഎ നോവോസ്റ്റിയോട് പറഞ്ഞു.
പുതിയ ദ്വീപുകൾ രൂപപ്പെടാനുള്ള സാധ്യതയുള്ള മേഖലകളാണിവയെന്ന് പറയാമെങ്കിലും ഇക്കാര്യത്തിൽ 100 ശതമാനം ഉറപ്പുള്ള പ്രവചനം നടത്താനാകില്ലെന്നും ലിയോനോവ് വ്യക്തമാക്കി. ഹിമാനികളുടെ മുൻഭാഗം പിൻവാങ്ങുന്നതിനനുസരിച്ച് ഇതുവരെ മഞ്ഞിനടിയിൽ മറഞ്ഞിരുന്ന ഭൂഭാഗങ്ങൾ പുറത്തുവരാനുള്ള സാധ്യതയാണുള്ളത്.
എന്നാൽ പുതുതായി പ്രത്യക്ഷപ്പെടുന്ന ഭൂഭാഗങ്ങൾ സ്ഥിരമായി ദ്വീപുകളായി തുടരണമെന്നില്ലെന്നും അദ്ദേഹം മുന്നറിയിപ്പ് നൽകി. ഒരു പ്രദേശത്ത് ഹിമാനിയുടെ മുൻഭാഗം പിൻവാങ്ങിയതിനെ തുടർന്ന് പുതിയ ദ്വീപ് രൂപപ്പെട്ടിരുന്നു. എന്നാൽ ഏതാനും വർഷങ്ങൾക്കുശേഷം ദ്വീപിനും പ്രധാന ഭൂഭാഗത്തിനുമിടയിൽ മണൽപ്പാത രൂപപ്പെട്ടതോടെ അത് പിന്നീട് ഉപദ്വീപായി മാറിയതായും ലിയോനോവ് വിശദീകരിച്ചു.
ഫ്രാൻസ് ജോസഫ് ലാൻഡിൽ 1990കളിൽ മെസ്യാറ്റ്സെവ് കേപ്പ് എന്നറിയപ്പെട്ടിരുന്ന മറ്റൊരു ഭൂസവിശേഷത പിന്നീട് മെസ്യാറ്റ്സെവ് ദ്വീപ് എന്ന് പുനർനാമകരണം ചെയ്തിരുന്നു. എന്നാൽ 2024ൽ ഇത് പൂർണമായും അപ്രത്യക്ഷമായി. യഥാർത്ഥത്തിൽ ഇത് സ്ഥിരമായ ഭൂഭാഗമല്ലെന്നും ഒരു വലിയ ഹിമപിണ്ഡമായിരുന്നുവെന്നും അത് പിന്നീട് ഉരുകിപ്പോയതാണെന്നും ലിയോനോവ് പറഞ്ഞു.
അതേസമയം, കാലാവസ്ഥാ വ്യതിയാനത്തിന്റെ പശ്ചാത്തലത്തിൽ ആർട്ടിക് മേഖല കൂടുതൽ എളുപ്പത്തിൽ എത്തിച്ചേരാവുന്ന പ്രദേശമായി മാറുകയാണ്. റഷ്യയുടെ ഭാവി സാമ്പത്തിക വികസനത്തിൽ ആർട്ടിക് മേഖലയ്ക്ക് മോസ്കോ വലിയ പ്രാധാന്യമാണ് നൽകുന്നത്. വടക്കൻ കടൽപാതയിലൂടെയുള്ള ഗതാഗതം വികസിപ്പിക്കുന്നതിനും നാവിഗേഷൻ കാലയളവ് ദീർഘിപ്പിക്കുന്നതിനുമായി റഷ്യ ഐസ് ബ്രേക്കർ കപ്പൽപ്പട വികസിപ്പിച്ചുവരികയാണ്.
ദീർഘകാലാടിസ്ഥാനത്തിൽ ആർട്ടിക് മേഖലയിലെ ധാതു വിഭവങ്ങളുടെ ഖനനം കൂടുതൽ വാണിജ്യപരമായി പ്രയോജനകരമാകുമെന്നാണ് റഷ്യയുടെ പ്രതീക്ഷ. അതേസമയം, മേഖലയിലെ തങ്ങളുടെ പ്രദേശിക അവകാശവാദങ്ങൾ ഉറപ്പിക്കുന്നതിനുള്ള ശ്രമങ്ങളും റഷ്യ തുടരുന്നുണ്ട്. പുതിയ ഭൂസവിശേഷതകൾ പ്രത്യക്ഷപ്പെടുന്നത് ഭൂപടനിർമാണത്തിലും ആർട്ടിക് മേഖലയിലെ സമുദ്രഗതാഗതത്തിലും കൂടുതൽ ശ്രദ്ധ ആവശ്യപ്പെടുന്ന സാഹചര്യം സൃഷ്ടിക്കുമെന്നാണ് വിലയിരുത്തൽ.
