2047 ഓടെ ഇന്ത്യയെ ‘വിക്ഷിത് ഭാരത്’ ആക്കുക എന്ന ലക്ഷ്യത്തിലേക്ക് രാജ്യം കൂടുതൽ വേഗത്തിലും ആത്മവിശ്വാസത്തോടെയും മുന്നേറണമെന്ന് പ്രധാനമന്ത്രി നരേന്ദ്ര മോദി. 80-ാം സ്വാതന്ത്ര്യദിനത്തോടനുബന്ധിച്ച് ചെങ്കോട്ടയിൽ നിന്ന് രാജ്യത്തെ അഭിസംബോധന ചെയ്ത് സംസാരിക്കവെയാണ് അദ്ദേഹം ഈ ആഹ്വാനം നടത്തിയത്.
ഇന്ത്യ ഇന്ന് ലോകത്തിലെ ഏറ്റവും വേഗത്തിൽ വളരുന്ന പ്രധാന സമ്പദ്വ്യവസ്ഥയായി മാറിയെന്ന് പ്രധാനമന്ത്രി പറഞ്ഞു. സ്വാതന്ത്ര്യത്തിന്റെ നൂറാം വാർഷികമായ 2047-ൽ വികസിത ഇന്ത്യ എന്ന സ്വപ്നം സാക്ഷാത്കരിക്കാൻ 140 കോടി ജനങ്ങളുടെ കൂട്ടായ പരിശ്രമം അനിവാര്യമാണെന്നും അദ്ദേഹം വ്യക്തമാക്കി.
രാജ്യത്തിന്റെ ഭാവിക്ക് ‘ആത്മനിർഭർ ഭാരത്’ നിർണായകമാണെന്ന് ചൂണ്ടിക്കാട്ടിയ മോദി, വിദേശ ആശ്രിതത്വം കുറച്ച് എല്ലാ മേഖലകളിലും സ്വയംപര്യാപ്തത കൈവരിക്കേണ്ടതുണ്ടെന്ന് പറഞ്ഞു. ഇന്ത്യയുടെ കഴിവുകൾ വികസിപ്പിക്കുകയും ദേശീയ താൽപര്യങ്ങൾ സ്വയം സംരക്ഷിക്കുകയും ചെയ്യേണ്ട സമയമാണിതെന്നും അദ്ദേഹം കൂട്ടിച്ചേർത്തു.
ചെങ്കോട്ടയിൽ ആദ്യമായി ‘വന്ദേമാതരം’ മുഴങ്ങിയ ദിനമാണിതെന്നും അതിനെ ചരിത്ര നിമിഷമായി വിശേഷിപ്പിച്ച പ്രധാനമന്ത്രി, ത്രിവർണ പതാക ഇന്ന് ഓരോ വീട്ടിലും ഓരോ മനസിലും നിറഞ്ഞുനിൽക്കുകയാണെന്നും പറഞ്ഞു.
സ്ത്രീശാക്തീകരണത്തിനും രാഷ്ട്രീയ പ്രാതിനിധ്യത്തിനും പ്രാധാന്യം നൽകിയ അദ്ദേഹം, ലോക്സഭയിലും സംസ്ഥാന നിയമസഭകളിലും സ്ത്രീകൾക്ക് അർഹമായ പ്രാതിനിധ്യം ഉറപ്പാക്കാൻ എല്ലാ രാഷ്ട്രീയ പാർട്ടികളും മുന്നോട്ട് വരണമെന്ന് അഭ്യർഥിച്ചു.
ഇന്ത്യ ഇന്ന് സ്ഥിരതയുള്ള ഭരണസംവിധാനവും ശക്തമായ ജനാധിപത്യവും സ്വതന്ത്ര നീതിന്യായ വ്യവസ്ഥയും ഉള്ള ബഹുമാനിക്കപ്പെടുന്ന ആഗോള ശക്തിയായി ഉയർന്നുവരുകയാണെന്നും ലോകം ഇന്ത്യയുടെ ആന്തരിക ശക്തികളെ തിരിച്ചറിഞ്ഞുതുടങ്ങിയെന്നും പ്രധാനമന്ത്രി മോദി പറഞ്ഞു.
