രാജ്യത്ത് സായുധ മാവോയിസ്റ്റ് ഭീഷണി ഇല്ലാതാക്കിയെങ്കിലും രാഷ്ട്രീയ പാർട്ടികൾ ഉൾപ്പെടെയുള്ള വിവിധ സംഘടനകളിൽ ‘ദിമാഗി നക്‌സലുകൾ’ നുഴഞ്ഞുകയറിയിട്ടുണ്ടെന്ന് പ്രധാനമന്ത്രി നരേന്ദ്ര മോദി. ഭരണഘടനയ്ക്കും ജനാധിപത്യത്തിനുമെതിരെ ജനങ്ങളെ പ്രേരിപ്പിക്കുകയാണ് ഇവരുടെ ലക്ഷ്യമെന്നും ഇത്തരം ഘടകങ്ങളെ തിരിച്ചറിഞ്ഞ് പരാജയപ്പെടുത്തണമെന്നും അദ്ദേഹം പറഞ്ഞു.
ഛത്തീസ്ഗഡിലെ ബസ്തർ ജില്ലയിലെ കരൻപുരിലുള്ള സെൻട്രൽ റിസർവ് പൊലീസ് ഫോഴ്‌സ് (സിആർപിഎഫ്) ക്യാമ്പിൽ സുരക്ഷാ ഉദ്യോഗസ്ഥർക്കൊപ്പം ദീപാവലി ആഘോഷിക്കുന്നതിനിടെയായിരുന്നു മോദിയുടെ പരാമർശം. മാവോയിസ്റ്റുകൾക്കെതിരായ പോരാട്ടത്തിൽ വലിയ വിജയം നേടിയ ശേഷമുള്ള ആദ്യ ദീപാവലിയായതിനാൽ ഇത്തവണത്തെ ആഘോഷത്തിന് പ്രത്യേകതയുണ്ടെന്നും അദ്ദേഹം പറഞ്ഞു.
ആയുധധാരികളായ നക്‌സലൈറ്റുകൾ വനമേഖലകളിൽനിന്ന് അപ്രത്യക്ഷമായെങ്കിലും വിവിധ സംഘടനകളുടെ നിയന്ത്രണം ദിമാഗി നക്‌സലുകൾ ഏറ്റെടുത്തിട്ടുണ്ടെന്നാണ് മോദിയുടെ ആരോപണം. രാജ്യത്തിന്റെ ഭരണഘടനയ്ക്കും ജനാധിപത്യത്തിനുമെതിരെ ജനങ്ങളെ ഇളക്കിവിടുന്ന ഇവരെ കണ്ടെത്തി പരാജയപ്പെടുത്തണമെന്നും അദ്ദേഹം കൂട്ടിച്ചേർത്തു.
ഈ വർഷത്തെ സ്വാതന്ത്ര്യദിന പ്രസംഗത്തിലാണ് മോദി ആദ്യമായി ‘ദിമാഗി നക്‌സലുകൾ’ എന്ന പ്രയോഗം നടത്തിയത്. മാർച്ച് 31ന് രാജ്യം നക്‌സലിസത്തിന്റെ ഭീഷണിയിൽനിന്ന് മുക്തമായെന്ന് കേന്ദ്ര സർക്കാർ പ്രഖ്യാപിച്ചിരുന്നു. ശരിയായ നയങ്ങളുടെയും ശക്തമായ രാഷ്ട്രീയ ഇച്ഛാശക്തിയുടെയും വിജയമാണ് മാവോയിസ്റ്റ് ഭീകരതയുടെ ഉന്മൂലനമെന്നും പ്രധാനമന്ത്രി അവകാശപ്പെട്ടു.
നക്‌സലൈറ്റുകളുടെയും വിഘടനവാദികളുടെയും സാമ്പത്തിക സ്രോതസ്സുകൾക്ക് കനത്ത പ്രഹരമേൽപ്പിക്കുന്ന നടപടികൾ സർക്കാർ സ്വീകരിച്ചിട്ടുണ്ടെന്നും മോദി പറഞ്ഞു. മുൻ സർക്കാരുകൾ സുരക്ഷാസേനയുടെ കൈകൾ കെട്ടിയിട്ടിരിക്കുകയായിരുന്നുവെന്നും മാവോയിസ്റ്റ് ആക്രമണങ്ങൾക്ക് ശക്തമായി തിരിച്ചടി നൽകാനുള്ള സ്വാതന്ത്ര്യം നിലവിലെ സർക്കാർ സേനകൾക്ക് നൽകിയെന്നും അദ്ദേഹം അവകാശപ്പെട്ടു.
