പ്രശസ്ത സംഗീത സംവിധായകൻ അനിരുദ്ധ് രവിചന്ദറും സൺറൈസേഴ്‌സ് ഹൈദരാബാദ് സഹ ഉടമ കാവ്യ മാരനും വിവാഹിതരായി. നവംബർ 11 ബുധനാഴ്ച ഗ്രീസിൽ അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിലായിരുന്നു വിവാഹച്ചടങ്ങുകൾ. ഇരുകുടുംബങ്ങളുടെയും നേതൃത്വത്തിൽ നടന്ന സ്വകാര്യ ചടങ്ങിന്റെ ചിത്രങ്ങൾ അനിരുദ്ധ് സമൂഹമാധ്യമങ്ങളിലൂടെ പങ്കുവെച്ചതോടെ ആരാധകർക്കിടയിൽ വാർത്ത ശ്രദ്ധനേടി.
നവംബർ 10ന് പരമ്പരാഗത തമിഴ് ആചാരപ്രകാരമുള്ള വിവാഹനിശ്ചയവും വിവാഹത്തിന് മുന്നോടിയായുള്ള ചടങ്ങുകളും നടന്നു. പിറ്റേന്ന് നടന്ന വിവാഹത്തിൽ പരമ്പരാഗത വസ്ത്രങ്ങളും മുത്തുകൾ പതിച്ച ആഭരണങ്ങളുമണിഞ്ഞാണ് ഇരുവരും എത്തിയത്. പുഷ്പവൃഷ്ടിയുടെ അകമ്പടിയോടെയായിരുന്നു വിവാഹച്ചടങ്ങുകൾ.
വിവാഹചിത്രങ്ങൾ പങ്കുവെച്ച അനിരുദ്ധ്, ‘എന്റെ ജീവിതത്തിൽ ഒരിക്കൽ മാത്രം, ജീവിതകാലം മുഴുവൻ… 11.11’ എന്ന അടിക്കുറിപ്പും നൽകി. സിനിമാ, കായിക മേഖലകളിലെ പ്രമുഖരടക്കം നിരവധി പേർ നവദമ്പതികൾക്ക് ആശംസകൾ നേർന്നു.
അനിരുദ്ധിന്റെ ബന്ധുവായ സൂപ്പർതാരം രജനീകാന്ത്, മകൾ ഐശ്വര്യ രജനീകാന്ത് എന്നിവരും വിവാഹത്തിൽ പങ്കെടുത്തതായി റിപ്പോർട്ടുകളുണ്ട്. സൺ ഗ്രൂപ്പ് ചെയർമാൻ കലാനിധി മാരന്റെ കുടുംബാംഗങ്ങൾക്കൊപ്പം രാഷ്ട്രീയ, സിനിമാ മേഖലകളിലെ പ്രമുഖരും ചടങ്ങിനെത്തി.
ഗ്രീസിൽ അടുത്ത ബന്ധുക്കൾക്കായി മാത്രമായി നടത്തിയ വിവാഹത്തിന് പിന്നാലെ ചെന്നൈയിൽ വിപുലമായ സ്വീകരണം സംഘടിപ്പിക്കാനാണ് തീരുമാനം. നവംബർ 21ന് നടക്കുന്ന വിരുന്നിൽ പ്രധാനമന്ത്രി നരേന്ദ്ര മോദി ഉൾപ്പെടെ സിനിമ, രാഷ്ട്രീയം, ബിസിനസ്, കായിക മേഖലകളിലെ പ്രമുഖർ പങ്കെടുക്കുമെന്നാണ് റിപ്പോർട്ടുകൾ.
