താരസംഘടനയായ ‘അമ്മ’യിൽ ആഭ്യന്തര തർക്കങ്ങൾ വീണ്ടും ചർച്ചയാകുന്നു. പ്രമുഖ നടി അൻസിബയ്ക്ക് സംഘടന ഔദ്യോഗികമായി കാരണം കാണിക്കൽ നോട്ടീസ് നൽകിയതോടെയാണ് പുതിയ വിവാദങ്ങൾക്ക് തുടക്കമായത്. വിവിധ മാധ്യമങ്ങൾക്ക് നൽകിയ അഭിമുഖങ്ങളിലൂടെ സംഘടനയുടെ പ്രതിച്ഛായ തകർക്കാൻ ബോധപൂർവം ശ്രമിച്ചുവെന്നാണ് നോട്ടീസിലെ പ്രധാന ആരോപണം.
അൻസിബയുടെ പരസ്യ പ്രതികരണങ്ങൾ സംഘടനയുടെ പ്രവർത്തനങ്ങളെ പ്രതികൂലമായി ബാധിച്ചെന്നും പൊതുസമൂഹത്തിൽ ‘അമ്മ’യ്ക്കുള്ള വിശ്വാസ്യതയും ജനപ്രീതിയും കുറയാൻ കാരണമായെന്നുമാണ് എക്സിക്യൂട്ടീവ് കമ്മിറ്റിയുടെ വിലയിരുത്തൽ. സംഘടനയെയും ഭാരവാഹികളെയും പ്രതിക്കൂട്ടിലാക്കുന്ന തരത്തിലുള്ള പ്രസ്താവനകളെ ഗൗരവത്തോടെയാണ് കമ്മിറ്റി കാണുന്നതെന്നും നോട്ടീസിൽ വ്യക്തമാക്കുന്നു.
ആരോപണങ്ങൾക്ക് വ്യക്തവും തൃപ്തികരവുമായ വിശദീകരണം നൽകണമെന്ന് അൻസിബയോട് ആവശ്യപ്പെട്ടിട്ടുണ്ട്. ജൂൺ 17-നകം മറുപടി ലഭിക്കാത്ത പക്ഷം കടുത്ത അച്ചടക്ക നടപടികളിലേക്ക് കടക്കുമെന്നും സംഘടന മുന്നറിയിപ്പ് നൽകിയിട്ടുണ്ട്.
