‘രാമായണം’ സിനിമയിൽ സീതയായി വേഷമിടുന്ന നടി സായ് പല്ലവിയുടെ രാവണനെക്കുറിച്ചുള്ള പരാമർശങ്ങൾ സോഷ്യൽ മീഡിയയിൽ ചർച്ചയാകുന്നു. ചിലർ താരത്തിന്റെ അഭിപ്രായത്തെ വിമർശിക്കുമ്പോൾ, മറ്റുചിലർ വിശദീകരണത്തെ പിന്തുണയ്ക്കുകയാണ്. ലോസ് ഏഞ്ചൽസിൽ നടന്ന ‘രാമായണം’ സിനിമയുടെ പ്രീമിയറിനിടെ നടത്തിയ പരാമർശങ്ങളുടെ വിഡിയോയാണ് ഇപ്പോൾ സമൂഹമാധ്യമങ്ങളിൽ പ്രചരിക്കുന്നത്.
ഇന്ത്യൻ സംസ്കാരത്തിലും ഇതിഹാസങ്ങളിലും താൽപ്പര്യമുള്ളവർക്ക് ‘രാമായണം’ നല്ലൊരു ആമുഖമായിരിക്കുമെന്ന് സായ് പല്ലവി പറഞ്ഞു. ഇതിഹാസത്തിലെ കഥകളിൽനിന്ന് സ്വന്തം ജീവിതത്തെ വിലയിരുത്താൻ പഠിക്കണമെന്നും നമ്മളിലെ നല്ലതും ചീത്തയുമായ ഗുണങ്ങളെ തിരിച്ചറിഞ്ഞ് കാലത്തിനനുസരിച്ച് സ്വയം മാറണമെന്നും താരം അഭിപ്രായപ്പെട്ടു.
‘രാവണൻ പൂർണമായും മോശമല്ല. നമ്മളിലെ രാവണനെ തിരിച്ചറിഞ്ഞ് സ്വയം മാറേണ്ടത് പ്രധാനമാണ്’ എന്ന സായ് പല്ലവിയുടെ വാക്കുകളാണ് ചർച്ചകൾക്ക് വഴിവച്ചത്. രാവണനെക്കുറിച്ച് ഇത്തരം പരാമർശങ്ങൾ നടത്തുന്നത് അനുചിതമാണെന്നാണ് ചിലരുടെ വിമർശനം. എന്നാൽ രാവണനെ ന്യായീകരിക്കുകയല്ല, മറിച്ച് ഓരോരുത്തരും സ്വന്തം ഉള്ളിലെ മോശം ഗുണങ്ങൾ തിരിച്ചറിഞ്ഞ് തിരുത്തണമെന്നാണ് താരം ഉദ്ദേശിച്ചതെന്ന് മറ്റുചിലർ വാദിക്കുന്നു. രാവണന്റെ ചില നല്ല ഗുണങ്ങൾ പരാമർശിക്കുന്നതിൽ തെറ്റില്ലെന്ന അഭിപ്രായവും ഉയരുന്നുണ്ട്.
നിതേഷ് തിവാരി സംവിധാനം ചെയ്യുന്ന ‘രാമായണം’ ചിത്രത്തിൽ രാമനായി രൺബീർ കപൂറും സീതയായി സായ് പല്ലവിയും രാവണനായി യാഷുമാണ് എത്തുന്നത്. ചിത്രത്തിന്റെ ആദ്യ ഭാഗം നവംബർ 5ന് റിലീസ് ചെയ്യുമെന്നാണ് റിപ്പോർട്ടുകൾ. സിനിമ പുറത്തിറങ്ങുന്നതിന് മുമ്പുതന്നെ താരത്തിന്റെ പരാമർശങ്ങൾ ചർച്ചയാകുന്നത് ചിത്രത്തിലേക്കുള്ള പ്രേക്ഷകശ്രദ്ധ വർധിപ്പിച്ചിരിക്കുകയാണ്.
