സ്ത്രീകൾ പൊതുവേദികളിൽ പ്രത്യക്ഷപ്പെടുന്നതിനെതിരെ സമസ്ത നേതാവ് കാന്തപുരം എ.പി. അബൂബക്കർ മുസ്ലിയാർ നടത്തിയ വിവാദ പരാമർശങ്ങളെ തള്ളി പ്രതിപക്ഷ നേതാവ് വി.ഡി. സതീശൻ. കാന്തപുരത്തിന്റെ നിലപാടുകളോട് ഒരു തരത്തിലും യോജിക്കാൻ കഴിയില്ലെന്നും ഇത്തരം യാഥാസ്ഥിതിക ആശയങ്ങൾ പുരോഗമന കേരളത്തിന് യോജിച്ചതല്ലെന്നും അദ്ദേഹം പറഞ്ഞു.
സ്ത്രീകൾ പൊതുരംഗത്ത് സജീവമാകുന്നത് സമൂഹത്തിന് വിനാശകരമാണെന്നും അവർ വീടുകളിൽ മാത്രം ഒതുങ്ങിക്കഴിയണമെന്നുമുള്ള വാദങ്ങൾ ചരിത്രപരമായ യാഥാർഥ്യങ്ങൾക്ക് നിരക്കുന്നതല്ലെന്ന് സതീശൻ ചൂണ്ടിക്കാട്ടി. ഇസ്ലാമിക ചരിത്രത്തെ തന്നെ തെറ്റായി വ്യാഖ്യാനിക്കുന്ന സമീപനമാണ് കാന്തപുരത്തിന്റെ ഭാഗത്തുനിന്ന് ഉണ്ടായതെന്നും അദ്ദേഹം വിമർശിച്ചു.
പ്രവാചകൻ മുഹമ്മദ് നബിയുടെ ആദ്യ ഭാര്യ ഖദീജ ഒരു പ്രമുഖ വ്യാപാരിയായിരുന്നു എന്നും മറ്റൊരു ഭാര്യ പൊതുപ്രവർത്തനങ്ങളിലും യുദ്ധരംഗത്തും പങ്കെടുത്തിട്ടുണ്ടെന്നും അദ്ദേഹം ഓർമിപ്പിച്ചു. ഇത്തരം ചരിത്രസത്യങ്ങളെ അവഗണിച്ച് സ്ത്രീകൾ വീടിന്റെ നാലുചുമരുകൾക്കുള്ളിൽ മാത്രം കഴിയേണ്ടവരാണെന്ന് പറയുന്നത് അംഗീകരിക്കാനാകില്ലെന്നും അദ്ദേഹം പറഞ്ഞു.
സ്ത്രീകൾക്ക് തുല്യാവകാശവും സാമൂഹിക പങ്കാളിത്തവും ഉറപ്പാക്കുന്ന ഒരു സമൂഹത്തിൽ അവരെ പൊതുജീവിതത്തിൽ നിന്നും പൊതുവേദികളിൽ നിന്നും മാറ്റിനിർത്താനുള്ള ശ്രമങ്ങൾ അപലപനീയമാണെന്ന് സതീശൻ വ്യക്തമാക്കി. ഒരു തരത്തിലും സ്വീകാര്യമല്ലാത്ത നിലപാടാണ് കാന്തപുരത്തിന്റെ ഭാഗത്തുനിന്ന് ഉണ്ടായതെന്നും അദ്ദേഹം കൂട്ടിച്ചേർത്തു.
