അധികാരത്തിലെത്തിയിട്ടും ബിജെപി പ്രതിപക്ഷത്തിന്റെ മാനസികാവസ്ഥയിൽനിന്ന് പുറത്തുവന്നിട്ടില്ലെന്ന് മഹാരാഷ്ട്ര നവനിർമാൺ സേന (എംഎൻഎസ്) അധ്യക്ഷൻ രാജ് താക്കറെ. മഹാരാഷ്ട്രയുടെ വിവിധ ഭാഗങ്ങളിൽ ബിജെപി സംഘടിപ്പിച്ച ‘ജനാധിപത്യം സംരക്ഷിക്കുക, അരാജകത്വം അവസാനിപ്പിക്കുക’ എന്ന പ്രതിഷേധ റാലിയെയാണ് അദ്ദേഹം പരിഹസിച്ചത്. മുംബൈയിൽ നടന്ന പൊതുചടങ്ങിൽ സംസാരിക്കുകയായിരുന്നു രാജ് താക്കറെ.
ഭരണത്തിലിരിക്കുമ്പോൾ ജനാധിപത്യം സംരക്ഷിക്കാൻ റാലി നടത്തേണ്ട സാഹചര്യം എന്താണെന്ന് അദ്ദേഹം ചോദിച്ചു. ബിജെപി ഇപ്പോഴും പ്രതിപക്ഷത്തിന്റെ മനോഭാവത്തിലാണ് പ്രവർത്തിക്കുന്നതെന്നും കോൺഗ്രസിന് പ്രതിപക്ഷത്തിന്റെ ഉത്തരവാദിത്വം എന്താണെന്ന് ഇതുവരെ മനസ്സിലായിട്ടില്ലെന്നും രാജ് താക്കറെ വിമർശിച്ചു. ജനാധിപത്യം സംരക്ഷിക്കാൻ ബിജെപി രംഗത്തിറങ്ങുന്നത് കെഎഫ്‌സിയുടെ പരസ്യത്തിലെ വൃദ്ധൻ കോഴികളെ രക്ഷിക്കാൻ ആഹ്വാനം ചെയ്യുന്നതുപോലെയാണെന്നും അദ്ദേഹം പരിഹസിച്ചു.
നിയമനിർമാണ കൗൺസിൽ തിരഞ്ഞെടുപ്പ് ഫലത്തെക്കുറിച്ച് പ്രധാനമന്ത്രി നരേന്ദ്ര മോദി സമൂഹമാധ്യമങ്ങളിലൂടെ നടത്തിയ പ്രതികരണത്തെയും രാജ് താക്കറെ വിമർശിച്ചു. അധികാരത്തിലിരിക്കുന്നവർ എല്ലാ രാഷ്ട്രീയ സംഭവങ്ങളോടും പ്രതികരിക്കേണ്ടതില്ലെന്നും വിമർശനങ്ങളെ ഉൾക്കൊള്ളാനുള്ള മനോഭാവം ഭരണപക്ഷത്തിനുണ്ടാകണമെന്നും അദ്ദേഹം പറഞ്ഞു.
