ബിജെപിക്കെതിരെ രൂക്ഷ ആരോപണങ്ങളുമായി തൃണമൂൽ കോൺഗ്രസ് അധ്യക്ഷയും പശ്ചിമ ബംഗാൾ മുൻ മുഖ്യമന്ത്രിയുമായ മമത ബാനർജി. പണവും ഭീഷണിയും ഉപയോഗിച്ച് ജനങ്ങളെ സ്വാധീനിക്കാനും തൃണമൂൽ കോൺഗ്രസ് നേതാക്കളെയും പ്രവർത്തകരെയും സമ്മർദത്തിലാക്കാനും ബിജെപി ശ്രമിക്കുകയാണെന്ന് മമത ആരോപിച്ചു. നിയമനടപടികൾ നേരിടേണ്ടിവരുമെന്ന് ഭീഷണിപ്പെടുത്താൻ സർക്കാർ ഉദ്യോഗസ്ഥരെ ഉപയോഗിക്കുന്നതായും തന്റെ ഓഫീസിലെത്തുന്നതിന് പോലും തടസ്സങ്ങൾ സൃഷ്ടിക്കുന്നതായും അവർ പറഞ്ഞു.
ഞായറാഴ്ച മുതൽ തൃണമൂൽ കോൺഗ്രസ് പ്രവർത്തകർക്കെതിരായ പൊലീസ് നടപടികൾ ശക്തമായതായി മാധ്യമങ്ങളോട് സംസാരിക്കവെ മമത ആരോപിച്ചു. ജില്ലാ മജിസ്‌ട്രേറ്റുമാർ, ബ്ലോക്ക് ഡെവലപ്‌മെന്റ് ഓഫീസർമാർ (ബിഡിഒ), സ്റ്റേഷൻ ഹൗസ് ഓഫീസർമാർ, പൊലീസ് സൂപ്രണ്ടുമാർ (എസ്പി) എന്നിവരെ ഉപയോഗിച്ച് ജനങ്ങളെ ഭീഷണിപ്പെടുത്തുകയാണെന്നും അവർ കുറ്റപ്പെടുത്തി.
വിഷയവുമായി ബന്ധപ്പെട്ട രേഖകൾ സമർപ്പിക്കാൻ കമ്മീഷൻ തന്റെ പാർട്ടിയോട് ആവശ്യപ്പെട്ടിട്ടുണ്ടെന്നും മമത വ്യക്തമാക്കി. എന്നാൽ, തൃണമൂൽ കോൺഗ്രസിന് തടസ്സങ്ങൾ സൃഷ്ടിക്കുന്ന സംസ്ഥാന ഭരണസംവിധാനം രാഷ്ട്രീയ എതിരാളികൾക്ക് സഹായം നൽകുകയാണെന്നാണ് അവരുടെ ആരോപണം.
“അവർക്ക് സർക്കാർ നിയമരേഖകളും സ്റ്റാമ്പ് പേപ്പറുകളും നോട്ടറൈസ് ചെയ്ത സത്യവാങ്മൂലങ്ങളും നൽകുന്നു. എന്നാൽ, ഞങ്ങൾക്കായി എല്ലാം തടഞ്ഞുവച്ചിരിക്കുകയാണ്,” മമത പറഞ്ഞു. തന്നെ കാണാനെത്തുന്നവരെപ്പോലും ഓഫീസിലേക്ക് പ്രവേശിക്കാൻ അനുവദിക്കുന്നില്ലെന്നും അവർ ആരോപിച്ചു.
രാജ്യത്ത് ജനങ്ങൾക്ക് ഇപ്പോഴും സ്വാതന്ത്ര്യമുണ്ടോയെന്ന് ചോദിച്ച മമത, ഇന്ത്യയുടെ സ്വാതന്ത്ര്യത്തിനായി പോരാടുകയും ജീവൻ ബലിയർപ്പിക്കുകയും ചെയ്ത നേതാക്കളുടെ ത്യാഗങ്ങളെക്കുറിച്ചും ഓർമിപ്പിച്ചു.
“നമ്മുടെ മഹാനായ നേതാക്കൾ സ്വാതന്ത്ര്യത്തിനായി പോരാടുകയും ജീവൻ ത്യജിക്കുകയും ചെയ്തു. ഇന്ന് ബിജെപി പണം നൽകി ആളുകളെ സ്വാധീനിക്കുന്നതും തൃണമൂൽ കോൺഗ്രസിൽ ചേരുന്നില്ലെങ്കിൽ ഞങ്ങളുടെ പ്രവർത്തകരെയും എംഎൽഎമാരെയും എംപിമാരെയും ജയിലിലടയ്ക്കുമെന്ന് ഭീഷണിപ്പെടുത്തുന്നതും കാണേണ്ടിവരുന്നു,” മമത ആരോപിച്ചു.
രാഷ്ട്രീയ പോരാട്ടം നേരിട്ട് ഏറ്റെടുക്കാൻ ബിജെപിയെ വെല്ലുവിളിച്ച മമത, ഭീഷണിയുടെയും സമ്മർദത്തിന്റെയും മാർഗങ്ങൾ ഉപേക്ഷിക്കണമെന്നും ആവശ്യപ്പെട്ടു. “ധൈര്യമുണ്ടെങ്കിൽ രാഷ്ട്രീയമായി പോരാടൂ. അതിൽ ഞങ്ങൾക്ക് എതിർപ്പില്ല,” എന്നായിരുന്നു അവരുടെ പ്രതികരണം.
