21-ാം നൂറ്റാണ്ടിലെ മികച്ച ബൗളർമാരുടെ പട്ടികയിൽ മൂന്നാം സ്ഥാനം നേടി ഇന്ത്യൻ പേസർ ജസ്പ്രീത് ബുംറ. ഇംഗ്ലണ്ട് താരങ്ങളായ ജോസ് ബട്ട്‌ലറും മുൻ പേസർ സ്റ്റുവർട്ട് ബ്രോഡും ചേർന്ന് തയ്യാറാക്കിയ പട്ടികയാണ് ബുംറയ്ക്ക് ഈ അംഗീകാരം നൽകിയത്. ‘ഫോർ ദ ലവ് ഓഫ് ക്രിക്കറ്റ്’ എന്ന പോഡ്‌കാസ്റ്റ് പരിപാടിയിലൂടെയാണ് ഇരുവരും ടോപ് 10 പട്ടിക പുറത്തുവിട്ടത്.
അന്തരിച്ച ഓസ്‌ട്രേലിയൻ ലെഗ് സ്പിൻ ഇതിഹാസം ഷെയ്ൻ വോണാണ് പട്ടികയിൽ ഒന്നാമത്. ഇംഗ്ലണ്ട് പേസർ ജെയിംസ് ആൻഡേഴ്‌സൺ രണ്ടാം സ്ഥാനത്തെത്തി. ബുംറ മൂന്നാം സ്ഥാനത്താണ്. ഓസ്‌ട്രേലിയൻ പേസർ ഗ്ലെൻ മഗ്രാത്ത് നാലാം സ്ഥാനവും നിലവിലെ ഓസ്‌ട്രേലിയൻ ക്യാപ്റ്റൻ പാറ്റ് കമ്മിൻസ് അഞ്ചാം സ്ഥാനവും നേടി.
ശ്രീലങ്കൻ സ്പിൻ ഇതിഹാസം മുത്തയ്യ മുരളീധരൻ ആറാം സ്ഥാനത്തും ദക്ഷിണാഫ്രിക്കൻ പേസർ ഡെയ്ൽ സ്റ്റെയ്ൻ ഏഴാം സ്ഥാനത്തുമാണ്. കാഗിസോ റബാഡ എട്ടാം സ്ഥാനവും ഷോൺ പൊള്ളോക്ക് ഒൻപതാം സ്ഥാനവും നേടി. ഓസ്‌ട്രേലിയൻ പേസർ മിച്ചൽ സ്റ്റാർക്കാണ് പട്ടികയിൽ പത്താമത്.
അന്താരാഷ്ട്ര ക്രിക്കറ്റിന്റെ മൂന്ന് ഫോർമാറ്റുകളിലുമായി 243 മത്സരങ്ങൾ കളിച്ച ബുംറ ഇതുവരെ 511 വിക്കറ്റുകൾ നേടിയിട്ടുണ്ട്. വ്യത്യസ്തമായ ബൗളിങ് ആക്ഷനും കൃത്യതയാർന്ന പന്തുകളുമാണ് ബുംറയുടെ പ്രധാന കരുത്ത്. സ്വന്തം മൈതാനങ്ങളിൽ മാത്രമല്ല, വിദേശത്തും പ്രത്യേകിച്ച് ടെസ്റ്റ് ക്രിക്കറ്റിൽ മികച്ച പ്രകടനം കാഴ്ചവയ്ക്കാൻ താരത്തിന് കഴിഞ്ഞിട്ടുണ്ട്.
അതേസമയം, അന്താരാഷ്ട്ര ക്രിക്കറ്റിൽ കൂടുതൽ വിക്കറ്റുകൾ നേടിയ രവിചന്ദ്രൻ അശ്വിൻ, അനിൽ കുംബ്ലെ, രവീന്ദ്ര ജഡേജ, നഥാൻ ലിയോൺ തുടങ്ങിയ പ്രമുഖ ബൗളർമാർ പട്ടികയിൽ ഇടം നേടിയിട്ടില്ലെന്നതും ശ്രദ്ധേയമാണ്. സമകാലിക താരങ്ങളായ ബട്ട്‌ലറും ബ്രോഡും ഉൾപ്പെടുത്തിയ പട്ടികയിൽ ബുംറയ്ക്ക് ലഭിച്ച മൂന്നാം സ്ഥാനം ഇന്ത്യൻ പേസറുടെ കരിയറിലെ ശ്രദ്ധേയമായ അംഗീകാരമായി വിലയിരുത്തപ്പെടുന്നു.
