റോഡ് ശൃംഖലയുടെ നിലവാരത്തിൽ ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി ശ്രദ്ധേയ നേട്ടം കൈവരിച്ചു. റോഡ് നെറ്റ്വർക്ക് ആസറ്റ് കണ്ടീഷൻ ഇൻഡക്സിൽ ദുബായിലെ 95 ശതമാനം റോഡ് ആസ്തികളും മികച്ച നിലവാരത്തിലുള്ളവയാണെന്ന് വിലയിരുത്തപ്പെട്ടു.
റോഡുകളുടെ കൃത്യമായ വിലയിരുത്തൽ, പ്രതിരോധ പരിപാലനം, മുൻകരുതൽ അറ്റകുറ്റപ്പണികൾ എന്നിവയാണ് ഈ നേട്ടത്തിന് പിന്നിലെ പ്രധാന ഘടകങ്ങൾ. ലിഡാർ, ആർട്ടിഫിഷ്യൽ ഇന്റലിജൻസ്, ഓട്ടോമേറ്റഡ് ഡാറ്റ എക്സ്ട്രാക്ഷൻ തുടങ്ങിയ സാങ്കേതികവിദ്യകൾ ഉപയോഗിച്ചാണ് ആർടിഎ റോഡ് ശൃംഖലയുടെ സ്ഥിതി നിരീക്ഷിക്കുന്നത്.
ട്രാഫിക് സിഗ്നലുകൾ, റോഡ് അടയാളങ്ങൾ, സുരക്ഷാ ബാരിയറുകൾ, ലൈറ്റിംഗ് പോളുകൾ ഉൾപ്പെടെ 38-ലധികം വിഭാഗങ്ങളിലുള്ള റോഡ് ആസ്തികളുടെ പരിശോധന ലിഡാർ സാങ്കേതികവിദ്യയിലൂടെ നടത്തുന്നു. പരമ്പരാഗത പരിശോധനകളേക്കാൾ 95 ശതമാനം വരെ കൂടുതൽ കൃത്യത ഈ സംവിധാനത്തിനുണ്ടെന്നാണ് ആർടിഎയുടെ വിലയിരുത്തൽ.
റോഡ് സുരക്ഷ വർധിപ്പിക്കാനും പരിപാലന ചെലവ് കുറയ്ക്കാനും ദീർഘകാല സുസ്ഥിരത ഉറപ്പാക്കാനും ഈ സാങ്കേതിക സംവിധാനങ്ങൾ സഹായിക്കുന്നതായി ആർടിഎ അറിയിച്ചു.
