പ്രധാനമന്ത്രി നരേന്ദ്ര മോദിയുടെ 76-ാം ജന്മദിനത്തിൽ ദക്ഷിണേന്ത്യൻ സിനിമയിലെ പ്രമുഖ താരങ്ങൾ ആശംസകളുമായി രംഗത്ത്. മോഹൻലാൽ, കമൽഹാസൻ, ധനുഷ്, നാഗാർജുന അക്കിനേനി തുടങ്ങിയ താരങ്ങളാണ് സോഷ്യൽ മീഡിയയിലൂടെ മോദിക്ക് ജന്മദിനാശംസകൾ നേർന്നത്.
മലയാള സിനിമയിലെ പ്രമുഖ നടൻ മോഹൻലാൽ എക്സിൽ പങ്കുവെച്ച കുറിപ്പിൽ പ്രധാനമന്ത്രിക്ക് ആശംസകൾ നേർന്നു. രാജ്യത്തിന്റെ പുരോഗതിക്കായുള്ള മോദിയുടെ പ്രവർത്തനങ്ങൾ ദശലക്ഷക്കണക്കിന് ആളുകൾക്ക് പ്രചോദനമാണെന്ന് കുറിച്ച അദ്ദേഹം, നല്ല ആരോഗ്യവും ശക്തിയും രാഷ്ട്രസേവനത്തിൽ തുടർച്ചയായ വിജയവും ആശംസിച്ചു.
മുതിർന്ന നടനും രാഷ്ട്രീയപ്രവർത്തകനുമായ കമൽഹാസനും മോദിക്ക് ആശംസകൾ നേർന്നു. വരും വർഷം പ്രധാനമന്ത്രിക്ക് നല്ല ആരോഗ്യവും ശക്തിയും രാജ്യത്തെ സേവിക്കാനുള്ള തുടർച്ചയായ അവസരങ്ങളും നൽകട്ടെയെന്നാണ് കമൽഹാസൻ എക്സിൽ കുറിച്ചത്.
നടൻ ധനുഷും പ്രധാനമന്ത്രി നരേന്ദ്ര മോദിക്ക് ജന്മദിനാശംസകൾ നേർന്നു. തെലുങ്ക് സിനിമയിലെ പ്രമുഖ താരമായ നാഗാർജുന അക്കിനേനി മോദിയുടെ ശക്തിയും ജ്ഞാനവും ദൃഢനിശ്ചയവും കൂടുതൽ ശക്തമാകട്ടെയെന്നും നല്ല ആരോഗ്യവും സമാധാനവും ഊർജവും ആശംസിച്ചുകൊണ്ടാണ് കുറിപ്പ് പങ്കുവെച്ചത്.
2026 സെപ്റ്റംബർ 17നാണ് നരേന്ദ്ര മോദി 76-ാം ജന്മദിനം ആഘോഷിച്ചത്. വിവിധ രാഷ്ട്രീയ നേതാക്കൾക്കും സിനിമാ, കായിക, സംഗീത മേഖലകളിലെ പ്രമുഖർക്കും പുറമെ നിരവധി പൊതുപ്രവർത്തകരും സോഷ്യൽ മീഡിയയിലൂടെ അദ്ദേഹത്തിന് ആശംസകൾ നേർന്നു.
മോദിയുടെ ജന്മദിനത്തോടനുബന്ധിച്ച് ബിജെപി രാജ്യവ്യാപകമായി സേവന-ജനസമ്പർക്ക പരിപാടികളും സംഘടിപ്പിക്കുന്നുണ്ട്. സെപ്റ്റംബർ 17 മുതൽ ഒക്ടോബർ 17 വരെ ‘സേവാ സങ്കൽപ് അഭിയാൻ’ ഉൾപ്പെടെയുള്ള വിവിധ പരിപാടികൾക്ക് പാർട്ടി നേതൃത്വം നൽകിയിട്ടുണ്ട്.
