ഹിന്ദു പ്രമുഖരുടെ സന്ദർശനത്തിനിടെ വനിതാ ജീവനക്കാരെ മാറ്റിനിർത്തി പുരുഷ ജീവനക്കാരെ നിയോഗിച്ചെന്ന വിവാദത്തിനിടെ ഈഫൽ ടവർ പ്രവർത്തിപ്പിക്കുന്ന കമ്പനിയുടെ ഡയറക്ടർ ജനറൽ പാട്രിക് ബ്രാങ്കോ റുയിവോ സ്ഥാനമൊഴിയുമെന്ന് അറിയിച്ചു. വർഷാവസാനത്തോടെ ചുമതല ഒഴിയുമെന്ന് അദ്ദേഹം ജീവനക്കാരെയും ഡയറക്ടർ ബോർഡിനെയും അറിയിച്ചതായി ഫ്രഞ്ച് മാധ്യമങ്ങൾ റിപ്പോർട്ട് ചെയ്തു.
സെപ്റ്റംബർ 5ന് ബോച്ചസൻവാസി അക്ഷർ പുരുഷോത്തം സ്വാമിനാരായണ സൻസ്ത (BAPS) പ്രതിനിധി സംഘം ഈഫൽ ടവർ സന്ദർശിച്ചപ്പോഴാണ് വിവാദത്തിന് തുടക്കമായത്. വനിതാ ജീവനക്കാരെ മാറ്റിനിർത്തുകയോ അവരുടെ സ്ഥാനത്ത് പുരുഷന്മാരെ നിയമിക്കുകയോ ചെയ്യണമെന്ന നിർദേശം താൻ നൽകിയിട്ടില്ലെന്ന് ബ്രാങ്കോ റുയിവോ വ്യക്തമാക്കി. എന്നാൽ സ്ത്രീ ജീവനക്കാരെ മാറ്റിനിർത്തിയ സംഭവത്തിൽ ഖേദിക്കുന്നതായും അദ്ദേഹം പറഞ്ഞു.
പ്രോട്ടോക്കോൾ സന്ദർശനങ്ങളുടെ സംഘാടനത്തിൽ നിരവധി അപാകതകളും വീഴ്ചകളും ഉണ്ടായതായി കമ്പനിയുടെ ആഭ്യന്തര അന്വേഷണത്തിൽ കണ്ടെത്തിയിരുന്നു. ഇതിന്റെ ഭാഗമായി വനിതാ ജീവനക്കാരെ മാറ്റിനിർത്തിയ നടപടി അംഗീകരിക്കാനാകാത്തതാണെന്നും SETE വ്യക്തമാക്കി. സംഭവത്തിൽ പാരീസ് നഗരം ആരംഭിച്ച പ്രത്യേക അന്വേഷണവും തുടരുകയാണ്.
വിവാദത്തിനിടെ വനിതാ ജീവനക്കാരെ ലിംഗത്തിന്റെ അടിസ്ഥാനത്തിൽ മാറ്റിനിർത്തുകയും ചിലരെ മറ്റ് മേഖലകളിലേക്ക് മാറ്റുകയും ചെയ്തതായി ഈഫൽ ടവർ ജീവനക്കാർ ആരോപിച്ചിരുന്നു. ചില തസ്തികകളിൽ പുരുഷന്മാരെ നിയമിച്ചതായും പ്രതിനിധി സംഘം സന്ദർശിക്കുന്ന മേഖലകളിലൂടെ വനിതാ ജീവനക്കാർ സഞ്ചരിക്കരുതെന്ന് നിർദേശിച്ചതായും ജീവനക്കാർ പറഞ്ഞിരുന്നു.
സംഭവത്തിൽ പ്രതിഷേധിച്ച് ഈഫൽ ടവർ ജീവനക്കാരെ പ്രതിനിധീകരിക്കുന്ന സിജിടി ട്രേഡ് യൂണിയൻ സെപ്റ്റംബർ 7ന് പണിമുടക്ക് നടത്തിയിരുന്നു. ഇതിനെ തുടർന്ന് അന്ന് ഈഫൽ ടവർ അടച്ചിടേണ്ടി വന്നു. സന്ദർശനത്തിനിടെ സ്ത്രീകളുമായുള്ള ഇടപെടലുകൾ പരിമിതപ്പെടുത്തുന്ന ക്രമീകരണങ്ങൾ BAPS പ്രതിനിധി സംഘം ആവശ്യപ്പെട്ടിരുന്നതായി SETE വ്യക്തമാക്കിയെങ്കിലും ഇത്തരം വ്യവസ്ഥകൾ അംഗീകരിക്കാൻ പാടില്ലായിരുന്നുവെന്നും കമ്പനി പിന്നീട് സമ്മതിച്ചു.
അതേസമയം, വനിതാ ജീവനക്കാരെ സന്ദർശനത്തിൽ നിന്ന് ഒഴിവാക്കാനോ മറച്ചുവയ്ക്കാനോ ആവശ്യപ്പെട്ടെന്ന ആരോപണം BAPS നിഷേധിച്ചു. തങ്ങളുടെ വ്യക്തിപരമായ ആത്മീയ ആചാരങ്ങൾ പാലിക്കാനാണ് ശ്രമിച്ചതെന്നും അത് മറ്റുള്ളവരിൽ അടിച്ചേൽപ്പിക്കാൻ ഉദ്ദേശിച്ചിട്ടില്ലെന്നും സംഘടന വ്യക്തമാക്കി. സംഭവത്തെ തുടർന്ന് ഉണ്ടായ വേദനയ്ക്കും അസൗകര്യത്തിനും BAPS ക്ഷമാപണം നടത്തുകയും ചെയ്തു.
പാരീസ് നഗരപ്രാന്തമായ ബുസി-സെന്റ്-ജോർജസിൽ പുതിയ BAPS ക്ഷേത്രത്തിന്റെ ഉദ്ഘാടനവുമായി ബന്ധപ്പെട്ട പരിപാടികളുടെ ഭാഗമായാണ് പ്രതിനിധി സംഘം ഈഫൽ ടവർ സന്ദർശിച്ചത്. ലണ്ടൻ, അബുദാബി, ന്യൂജേഴ്‌സിയിലെ റോബിൻസ്‌വില്ലെ എന്നിവിടങ്ങളിലടക്കം വിവിധ രാജ്യങ്ങളിൽ ഹിന്ദു ക്ഷേത്രങ്ങളും സാംസ്കാരിക സമുച്ചയങ്ങളും നടത്തുന്ന സംഘടനയാണ് BAPS.
