തിരഞ്ഞെടുപ്പ് ക്രമക്കേടുകൾ ആരോപിച്ച് കേന്ദ്ര സർക്കാരിനെതിരെ കോക്രോച്ച് ജനതാ പാർട്ടി (സിജെപി) നടത്താനിരിക്കുന്ന പ്രതിഷേധത്തിന് ഡൽഹി ഹൈക്കോടതിയുടെ അനുമതി. ഒക്ടോബർ 16 വെള്ളിയാഴ്ച കൊണാട്ട് പ്ലേസിലെ സെൻട്രൽ പാർക്കിൽ നടത്താൻ നിശ്ചയിച്ചിരിക്കുന്ന പ്രതിഷേധം തടയണമെന്ന് ആവശ്യപ്പെട്ട് സമർപ്പിച്ച ഹർജി കോടതി തള്ളി. നിയമപ്രകാരം പ്രതിഷേധം നിയന്ത്രിക്കാൻ ആവശ്യമായ നടപടികൾ സ്വീകരിക്കുമെന്ന് ഡൽഹി പൊലീസ് നൽകിയ ഉറപ്പ് കോടതി രേഖപ്പെടുത്തി.
ദസറ ആഘോഷകാലത്തെ പ്രതിഷേധം തന്റെ വ്യാപാരത്തെ ബാധിക്കുമെന്നും വലിയ സാമ്പത്തിക നഷ്ടമുണ്ടാക്കുമെന്നും ചൂണ്ടിക്കാട്ടി ഒരു തെരുവുകച്ചവടക്കാരനാണ് ഹർജി നൽകിയത്. കൊണാട്ട് പ്ലേസ് പ്രതിഷേധങ്ങൾക്കുള്ള വേദിയല്ലെന്നും പരിപാടി തടയണമെന്നും ഹർജിക്കാരന്റെ അഭിഭാഷകൻ വാദിച്ചു. എന്നാൽ, സിജെപിയുടെ പ്രവർത്തനങ്ങൾ നിയന്ത്രിക്കാൻ ആവശ്യമായ നടപടികൾ സ്വീകരിച്ചിട്ടുണ്ടെന്ന് അഡീഷണൽ സോളിസിറ്റർ ജനറൽ ചേതൻ ശർമ കോടതിയെ അറിയിച്ചു. തുടർന്ന് ആക്ടിങ് ചീഫ് ജസ്റ്റിസ് നിതിൻ വാസുദേവ് സാംബ്രെ, ജസ്റ്റിസ് സഞ്ജയ് ശർമ എന്നിവരടങ്ങിയ ബെഞ്ച് പ്രതിഷേധം തടയാൻ വിസമ്മതിച്ചു.
തിരഞ്ഞെടുപ്പ് ക്രമക്കേടുകൾക്കെതിരെ ശബ്ദമുയർത്തുന്ന വിദ്യാർഥികളെയും യുവാക്കളെയും പൊലീസ് ബലംപ്രയോഗിച്ച് നീക്കുകയാണെന്ന് സിജെപി സ്ഥാപകൻ അഭിജീത് ദീപ്‌കെ ആരോപിച്ചു. രാഹുൽ ഗാന്ധി, മമത ബാനർജി, അരവിന്ദ് കെജ്‌രിവാൾ തുടങ്ങിയ പ്രതിപക്ഷ നേതാക്കളെ പിന്തുണയ്ക്കാനെത്തിയവരെ കസ്റ്റഡിയിലെടുത്ത നടപടിയെയും അദ്ദേഹം വിമർശിച്ചു. പ്രധാനമന്ത്രി നരേന്ദ്ര മോദി മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ തടഞ്ഞുവെച്ചിരിക്കുകയാണെന്നും ദീപ്‌കെ ആരോപിച്ചു. പ്രതിഷേധത്തിൽ പങ്കെടുക്കുമെന്ന് ആം ആദ്മി പാർട്ടിയും പ്രഖ്യാപിച്ചിട്ടുണ്ട്. ദേശീയ പതാകകളുമായി പ്രതിഷേധത്തിൽ അണിനിരക്കാൻ ദീപ്‌കെ ആഹ്വാനം ചെയ്തു.
അതേസമയം, വോട്ടർപട്ടിക പരിഷ്കരണവുമായി ബന്ധപ്പെട്ട് രാഹുൽ ഗാന്ധിയും ഇന്ത്യാ സഖ്യത്തിലെ മറ്റ് നേതാക്കളും സമർപ്പിച്ച ഹർജികളിൽ സുപ്രീംകോടതി തിരഞ്ഞെടുപ്പ് കമ്മീഷനും കമ്മീഷണർമാർക്കും നോട്ടീസ് അയച്ചിട്ടുണ്ട്. സുപ്രീംകോടതി പരിസരത്ത് ഇന്ത്യാ സഖ്യ നേതാക്കൾ നടത്തിയ മാർച്ചുമായി ബന്ധപ്പെട്ട ഹർജിയും ഒക്ടോബർ 12ന് കോടതി പരിഗണിച്ചു. ഈ ഘട്ടത്തിൽ, ആർക്കും ജുഡീഷ്യറിയെ ഭീഷണിപ്പെടുത്താനാകില്ലെന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി. പ്രതിഷേധത്തിന്റെ സിസിടിവി ദൃശ്യങ്ങൾ സംരക്ഷിക്കാനും അദ്ദേഹം അധികാരികൾക്ക് നിർദേശം നൽകി.
