തമിഴ് ചലച്ചിത്ര സംഗീത ലോകത്തെ പ്രമുഖ സംഗീത സംവിധായകനും ഗായകനുമായ ദേവ (75) അന്തരിച്ചു. ചെന്നൈയിലെ സൂര്യ ആശുപത്രിയിൽ പ്രവേശിപ്പിച്ചതിന് പിന്നാലെയായിരുന്നു അന്ത്യം. തനതായ സംഗീതശൈലിയിലൂടെ ആരാധകരുടെ സ്നേഹം നേടിയ അദ്ദേഹം ‘തേനിസൈ തെൻട്രൽ’ എന്ന പേരിലാണ് അറിയപ്പെട്ടിരുന്നത്.
1950 നവംബർ 20ന് ദേവനേശൻ ചൊക്കലിംഗം എന്ന പേരിൽ ജനിച്ച ദേവ, ഗാനമേളകളിലൂടെയാണ് സംഗീതരംഗത്തേക്ക് കടന്നുവന്നത്. പിന്നീട് തമിഴ്, തെലുങ്ക്, കന്നഡ, മലയാളം ഭാഷകളിലായി മൂന്ന് പതിറ്റാണ്ടിലേറെ നീണ്ട കരിയറിൽ നിരവധി സിനിമകൾക്ക് സംഗീതം നൽകി. നാടൻപാട്ടുകളെയും ഗാനമേളയുടെ താളങ്ങളെയും സിനിമാ സംഗീതവുമായി കൂട്ടിയിണക്കിയ ശൈലിയാണ് അദ്ദേഹത്തെ ജനപ്രിയനാക്കിയത്.
തമിഴ് സിനിമയിലെ സൂപ്പർഹിറ്റ് ചിത്രങ്ങളായ ‘ബാഷ’, ‘അണ്ണാമലൈ’, ‘ആസൈ’, ‘കാതൽ കോട്ടൈ’, ‘നേർക്കു നേർ’, ‘വാലി’, ‘കുഷി’ എന്നിവയ്ക്ക് സംഗീതമൊരുക്കിയത് ദേവയായിരുന്നു. മലയാളത്തിൽ ‘ദ പ്രിൻസ്’, ‘കിങ് സോളമൻ’, ‘ഫാന്റം’ തുടങ്ങിയ ചിത്രങ്ങൾക്കും അദ്ദേഹം സംഗീതം നൽകി. ഹിന്ദി ചിത്രം ‘ചാച്ചി 420’യുടെ പശ്ചാത്തലസംഗീതവും നിർവഹിച്ചു.
സംഗീതസംവിധായകനെന്ന നിലയിൽ മാത്രമല്ല, നടനായും അദ്ദേഹം ശ്രദ്ധ നേടിയിരുന്നു. ‘സുമ്മാ ഇരുങ്ക മച്ചാൻ’, ‘ഉന്നിടത്തിൽ എന്നൈ കൊടുത്തേൻ’, ‘ഇംഗ്ലീഷ്കാരൻ’ തുടങ്ങിയ ചിത്രങ്ങളിൽ അഭിനയിച്ചിട്ടുണ്ട്.
തമിഴ്നാട് സർക്കാരിന്റെ കലൈമാമണി പുരസ്കാരവും ‘ആസൈ’ എന്ന ചിത്രത്തിലൂടെ മികച്ച സംഗീതസംവിധായകനുള്ള സംസ്ഥാന പുരസ്കാരവും ദേവയ്ക്ക് ലഭിച്ചിട്ടുണ്ട്. പ്രശസ്ത സംഗീതസംവിധായകൻ ശ്രീകാന്ത് ദേവ ഉൾപ്പെടെ സബേഷ്, മുരളി എന്നിവരാണ് മക്കൾ.
ദേവയുടെ വിയോഗത്തോടെ തെന്നിന്ത്യൻ സിനിമാ സംഗീതരംഗത്തിന് ശ്രദ്ധേയനായൊരു കലാകാരനെയാണ് നഷ്ടമായത്.
