ഐഐടി മദ്രാസിലെ യുവ സംരംഭകരും ഗവേഷകരും വികസിപ്പിക്കുന്ന നൂതന സാങ്കേതികവിദ്യകളെ പ്രശംസിച്ച് പ്രധാനമന്ത്രി നരേന്ദ്ര മോദി. സാമ്പത്തിക സുരക്ഷ, ആരോഗ്യപരിരക്ഷ, പ്രതിരോധം, ഗതാഗതം തുടങ്ങി വിവിധ മേഖലകളിൽ രാജ്യത്തെ യുവാക്കൾ നൂതന പരിഹാരങ്ങൾ കണ്ടെത്തുകയാണെന്ന് അദ്ദേഹം പറഞ്ഞു. പ്രതിമാസ റേഡിയോ പരിപാടിയായ ‘മൻ കി ബാത്തിന്റെ’ 139-ാം പതിപ്പിൽ സംസാരിക്കുകയായിരുന്നു പ്രധാനമന്ത്രി. ചെന്നൈ സന്ദർശനത്തിനിടെ യുവാക്കളുമായി നടത്തിയ കൂടിക്കാഴ്ചകളും ഐഐടി മദ്രാസിലെ സന്ദർശനവും അദ്ദേഹം അനുസ്മരിച്ചു.
പ്രശ്നങ്ങൾക്ക് നൂതനമായ പരിഹാരങ്ങൾ കണ്ടെത്താൻ യുവാക്കൾ നടത്തുന്ന ശ്രമങ്ങൾ ഏറെ സന്തോഷം നൽകുന്നതാണെന്ന് മോദി പറഞ്ഞു. സ്വർണം വാങ്ങുമ്പോൾ ഉപഭോക്താക്കൾ വഞ്ചിക്കപ്പെടുന്നത് തടയാൻ അതിന്റെ ഗുണനിലവാരം പരിശോധിക്കുന്ന സാങ്കേതികവിദ്യ വികസിപ്പിക്കുന്ന ഒരു സ്റ്റാർട്ടപ്പിനെക്കുറിച്ച് അദ്ദേഹം പരാമർശിച്ചു. ബാങ്ക് തട്ടിപ്പുകളിലൂടെ നഷ്ടപ്പെടുന്ന പണം വേഗത്തിൽ വീണ്ടെടുക്കാൻ സഹായിക്കുന്ന പ്ലാറ്റ്‌ഫോം വികസിപ്പിക്കുന്ന മറ്റൊരു സംഘവും പ്രവർത്തിക്കുന്നുണ്ട്. ഗർഭാശയഗള കാൻസർ പരിശോധനയിൽ നിർമിതബുദ്ധി (എഐ) ഉപയോഗിക്കുന്നതിനുള്ള ഗവേഷണവും ഐഐടി മദ്രാസിലെ യുവസംഘം നടത്തുന്നുണ്ട്.
ആഴത്തിലുള്ള സാങ്കേതികവിദ്യകളിൽ (ഡീപ് ടെക്) ശ്രദ്ധ കേന്ദ്രീകരിച്ചാണ് ഐഐടി മദ്രാസിലെ സ്റ്റാർട്ടപ്പുകൾ പ്രവർത്തിക്കുന്നതെന്ന് പ്രധാനമന്ത്രി വ്യക്തമാക്കി. കടലിന് മുകളിലൂടെ പറക്കാൻ കഴിയുന്ന ഇലക്ട്രിക് വാഹനം വികസിപ്പിക്കുന്ന സ്റ്റാർട്ടപ്പും ഡ്രോണുകൾക്കും ഇലക്ട്രിക് വാഹനങ്ങൾക്കുമായി അതിവേഗ ചാർജിങ് ബാറ്ററികൾ നിർമിക്കുന്ന സംഘവും ഇതിലുണ്ട്. പ്രതിരോധ സാങ്കേതികവിദ്യയിൽ എഐയുടെ സാധ്യതകൾ പ്രയോജനപ്പെടുത്തുന്നതിനുള്ള പ്രവർത്തനങ്ങളും പുരോഗമിക്കുകയാണ്. ഐഐടി മദ്രാസിന്റെ ഇൻകുബേഷൻ സംവിധാനത്തിന്റെ പിന്തുണയോടെയാണ് ഇത്തരം സംരംഭങ്ങൾ മുന്നേറുന്നതെന്നും അദ്ദേഹം പറഞ്ഞു.
യുവാക്കൾക്ക് അനുയോജ്യമായ അന്തരീക്ഷവും പിന്തുണയും ലഭിക്കുമ്പോൾ അസാധാരണമായ നേട്ടങ്ങൾ കൈവരിക്കാനാകുമെന്ന് മോദി ചൂണ്ടിക്കാട്ടി. രാജ്യത്ത് പ്രതിഭകൾക്ക് ഒരിക്കലും കുറവുണ്ടായിരുന്നില്ലെന്നും അവരെ വളർത്തിയെടുക്കാൻ ആവശ്യമായ അവസരങ്ങൾ ഒരുക്കുകയാണ് വേണ്ടതെന്നും അദ്ദേഹം കൂട്ടിച്ചേർത്തു.
ഫൈബർ ഒപ്റ്റിക്‌സിന്റെ പിതാവിനെ അനുസ്മരിച്ച് മോദി
ഇന്ത്യൻ ശാസ്ത്രലോകത്തിന്റെ സംഭാവനകൾ അനുസ്മരിച്ച പ്രധാനമന്ത്രി, ഫൈബർ ഒപ്റ്റിക്‌സിന്റെ പിതാവ് എന്നറിയപ്പെടുന്ന ശാസ്ത്രജ്ഞൻ നരീന്ദർ സിങ് കപാനിയുടെ നൂറാം ജന്മവാർഷികത്തോടനുബന്ധിച്ചും സംസാരിച്ചു. ഒക്ടോബർ 31-നാണ് കപാനിയുടെ നൂറാം ജന്മവാർഷികം. പഞ്ചാബിലെ മോഗ ജില്ലയിൽ ജനിച്ച അദ്ദേഹം ഫൈബർ ഒപ്റ്റിക്‌സ് സാങ്കേതികവിദ്യയുടെ വികസനത്തിൽ നിർണായക സംഭാവനകൾ നൽകിയ വ്യക്തിയാണ്.
നേർത്ത നാരുകളിലൂടെ പ്രകാശം കൈമാറുന്നതിനെക്കുറിച്ചുള്ള കപാനിയുടെ ഗവേഷണം ആശയവിനിമയ സാങ്കേതികവിദ്യയ്ക്ക് പുതിയ ദിശ നൽകിയെന്ന് മോദി പറഞ്ഞു. ഫൈബർ ഒപ്റ്റിക്‌സ് ഇല്ലാത്ത ഇന്നത്തെ ഇന്റർനെറ്റ്, ഡിജിറ്റൽ ആശയവിനിമയ ലോകത്തെക്കുറിച്ച് സങ്കൽപ്പിക്കാൻ പോലും പ്രയാസമാണെന്നും അദ്ദേഹം ചൂണ്ടിക്കാട്ടി.
കപാനിയെപ്പോലുള്ള ശാസ്ത്രജ്ഞരെക്കുറിച്ച് യുവാക്കൾ വായിക്കുകയും പഠിക്കുകയും അവരിൽനിന്ന് പ്രചോദനം ഉൾക്കൊള്ളുകയും വേണമെന്ന് പ്രധാനമന്ത്രി ആഹ്വാനം ചെയ്തു.
